«Հետխորհրդային տարածքի հակամարտություններում պետք չէ գտնել ընդհանուր կամ նույնանման ալգորիթմներ, դրանք բոլորն արմատապես տարբեր են ու ամեն մեկն ունի իր առանձնահատկությունները», -այսպես է կարծում ՌԴ Հանրային պալատի միջազգային հարցերով հանձնաժողովի նախագահ, Քաղաքական հետազոտությունների ինստիտուտի տնօրեն Սերգեյ Մարկովը:
«ԱՊԱ»-ի փոխանցմամբ, Մարկովը նշել է, որ Ղարաբաղի խնդիրը կարգավորվելու միտում ունի. «Ադրբեջանն այժմ ուզում է իրացնել ուժերի նոր հարաբերակցությունը: ԱՄՆ-ը և Ֆրանսիան օտարվել են հակամարտության լուծումից: Թե ինչ որոշում կընդունվի, դեռ պարզ չէ: Բայց դա կլինի, կարծում եմ, ժամանակավոր մի մեծ փոխզիջում», – ասել է քաղաքագետը «Հետխորհրդային տարածքի թեժ կետերը. ռազմական հակամարտությունների ի հայտ գալու վտանգները և դրանց կարգավորելու հեռանկարները» թեմայով «կլոր սեղանի» ժամանակ:
«ԱՊԱ»-ն գրում է, որ Մարկովի կարծիքով, Հայաստանի վերահսկման տակ գտնվող 7 շրջանները կարող են Ադրբեջանին հանձնել Թուրքիայի և Ադրբեջանի շրջափակումը հանելուց հետո:
Պատրաստեց Հովհաննես ԻՇԽԱՆՅԱՆԸ
