Վարդան Պետրոսյանի ավտովթարի գործով այսօր դատարան էին ներկայացել տուժողներ Արթուր Հակոբյանը, Նաիրա Հայրապետյանը:
Կոտայքի մարզի ընդհանուր իրավասության դատարանի դատավոր Վաղինակ Մկրտչյանը խորհրդակցական սենյակ է մտել այն բանից հետո, երբ տուժող կողմի ներկայացուցիչ Ռուբեն Բալոյանը հանդես եկավ ինքնաբացարկի միջնորդությամբ:
Ռ.Բալոյանը տարակուսանք հայտնեց մեղադրող Արթուր Սարգսյանի գործողությունների դեմ, նշելով, թե այդ ամենն արվում է դատավորի լուռ համաձայնությամբ:
Կարդացեք նաև
Խոսքը մեղադրողի այն արտահայտությանն էր վերաբերում, որն արվել էր նախորդ միջնորդության քննության ժամանակ: Ռ.Բալոյանը հիշեցրեց, որ երբ ինքը միջնորդություն էր արել Վ.Պետրոսյանի խմածության վերաբերյալ փաստաթղթերի դատաձեռագրաբանական եւ ձեռագրաբանական փորձաքննություն անցկացնելու մասին, մեղադրողն ասել է, թե որեւէ բան չի տա, եթե պարզվի, որ ձեռագրում տեղի են ունեցել փոփոխություններ:
Իր միջնորդության մեջ Ռ. Բալոյանը դիմելով դատավորին ասաց. «Դուք Ձեր վարքագծով միանում եք ամբաստանյալին, միանալով նրանց պաշտպաններին»:
Վարդան Պետրոսյանի պաշտպան Նիկոլայ Բաղդասարյանն ասաց, որ դատավորը խախտել է նյութական եւ դատավարական մի շարք նորմեր:
Ըստ նրա, Վարդան Պետրոսյանի նկատմամբ քրեական հետապնդումը չդադարեցնելը, արդեն իսկ ինքնաբացարկ հայտնելու հիմք էր: Ինչ վերաբերում է ինքնաբացարկի միջնորդությունը քննարկելուն, ըստ նրա, դատավորն իրավունք չունի, իրավասու չէ գնալ, իր դեմ արված միջնորդության քննարկումը ձեւական է:
Վարդան Պետրոսյանը ինքնաբացարկի հարցը թողեց դատարանի հայեցողությանը եւ ասաց ռուսերենով հետեւյալը. «Քաղաքացի Բալոյանը ռուսական առած նշեց՝ «կաժդի դումայետ»… եւ կիսատ թողեց: Ես ուզում եմ վերջացնեմ. «կաժդի դումայետ պո մերի սվոյեյ իսպոռչնոստի»: Համաձայն եմ, դրա հետ, եթե դա էր ուզում ասել:Միանգամայն համաձայն եմ, ավելացնեմ.ո վ ինչ ասում է, իրեն է ասում, հատկապես եթե խոսում է ուրիշի մասին»:
