Այսօր ԱԺ պետաիրավական հարցերի մշտական հանձնաժողովում քննարկվեց «Արխիվային գործի մասին» ՀՀ օրենքում փոփոխություններ եւ լրացումներ կատարելու մասին օրինագիծը, որը ներկայացրեց կառավարությունը: Այս նախաձեռնությամբ կառավարությունն առաջարկում է, որ դատական գործերը պահվեն 30 տարի, դրանից հետո արխիվ ուղարկվեն:
ՀԱԿ խմբակցության պատգամավոր Գագիկ Ջհանգիրյանն առաջարկեց, որ միայն ծանր հանցագործությունների դեպքում գործերը 30 տարի պահեն, որովհետեւ անձի ազատազրկումից հետո էլ հնարավոր է նոր հանգամանքներ, նոր փաստեր ի հայտ գան եւ գործը նորից վերանայվի: Իսկ մյուս դեպքերում Գագիկ Ջհանգիրյանն առաջարկում է գործերն այդքան չպահել, այլ ուղարկել արխիվ:
ՕԵԿ պատգամավոր Հովհաննես Մարգարյանն ասաց, որ դեպքեր են լինում, երբ կա որոշում՝ սեփականության վկայականի հետ կապված, բայց չկա ծանուցում. «Մենք բախվել ենք այդ խնդրի հետ, երբ պատասխանել են, որ ոչնչացվել է ծանուցման փաստաթուղթը»:
Կարդացեք նաև
Տարածքային կառավարման նախարարի պաշտոնակատար Վաչե Տերտերյանն ասաց, որ չի ոչնչացվում, ուղարկվում է արխիվ: Սակայն պատգամավորները նշեցին, որ գերատեսչությունն ինքն է որոշում, որը ոչնչացնի, որը արխիվացնի: Գագիկ Ջհանգիրյանի խոսքերով՝ «դրա համար էլ գերատեսչությունն իր ժուլիկությունները ոչնչացնում է»:
Վաչե Տերտերյանն ասաց, որ իրենք այդքան մեծ ծավալով էլեկտրոնային կրիչների վրա չեն կարող պահպանել ամբողջը:
Ըստ Հովհաննես Մարգարյանի, գոնե կառավարությունը պետք է մի ձեւ սահմանի, որ նվազագույնը սա պետք է պաշտպանես. «Թող էլի գերատեսչությունը որոշի, բայց կառավարությունը շեմ սահմանի»:
Վաչե Տերտերյանն ասաց, որ դա լուծելի խնդիր է, հետագայում կորոշեն:
Հանձնաժողովը դրական եզրակացությամբ օրինագիծը որոշեց ընդգրկել ԱԺ նիստերի օրակարգ:
Հռիփսիմե ՋԵԲԵՋՅԱՆ
