«Մուլտի Գրուպ» կոնցեռնի հիմնադիր Գագիկ Ծառուկյանի նախաձեռնությամբ և անգլիացի գործընկերների հետ համատեղ, այսօր իր դռները բացեց «Մուլտի Գրանդ» հյուրանոցային համալիրը: Բացման հանդիսավոր արարողությանը մասնակցեցին բարձրաստիճան պաշտոնյաներ՝ կառավարության ղեկավարի գլխավորությամբ:
Ըստ ԲՀԿ-ի պաշտոնական կայքէջի՝ Գագիկ Ծառուկյանն ընդգծեց, որ իր համար հատկապես կարևոր է սեփական երկրում ներդրումներ անելը, և կրկնակի ուրախալի է, երբ նման մեծամասշտաբ նախագծերում նաև հսկայական ներդրումներ են անում արտասահմանցի գործընկերները, որոնց համար ամենակարևոր գործոնը վստահելի գործընկերների առկայությունն է:
«Պետք չէ մեզանից հեռացնել վաղվա օրվա հանդեպ հավատն ու հույսը, պարզապես պետք է գործել ու ստեղծել նոր աշխատատեղեր», – իր խոսքում նշեց Գագիկ Ծառուկյանը:
ՀՀ վարչապետ Հովիկ Աբրահամյանն նոր հյուրանոցային համալիրի բացումն առաջին հերթին կարևորեց օտարերկրյա ներդրումների տեսանկյունից: Վարչապետը խոստովանեց, որ «Մուլտի Գրանդ» հյուրանոցային համալիրի առկայությունը հետայսու թույլ կտա ամենաբարձր մակարդակով կազմակերպել ամենատարբեր միջազգային հնչեղության միջոցառումներ, իսկ առաջիկա պետական ու պաշտոնական այցերի ժամանակ հյուրընկալել ամենաբարձրաստիճան պաշտոնյաների:
