«Չեմ հանգստացել և չեմ էլ պատրաստվում հանգստանալ Թուրքիայում»,-Aravot.am-ի հարցին՝ հանգստացե՞լ է Թուրքիայում, այսպիսի կարծիք հայտնեց ՀՀԿ խմբակցության պատգամավոր Կարեն Ավագյանը: Նա եկել էր մասնակցելու «Ոչ Թուրքիայում հանգստին» ակցիային:
Մեզ հետ զրույցում Կարեն Ավագյանը շեշտեց, թե ցանկանում են, որ նման և ընդհանրապես Հայոց ցեղասպանության հարյուրամյակին նվիրված միջոցառումներին անմասն չմնան նաև երիտասարդական կազմակերպությունները: Այս առիթով ՀՀԿ-ական պատգամավորը նկատեց. «Սա ասում եմ այն պատճառով, որ մենք կարողանանք բարձրաձայնել, դատապարտել, ոչ միայն ինքներս մեր մեջ խոսել ու տարածել, այլ որ դա նաև դուրս գա երկրի սահմաններից երիտասարդների միջոցով: Թեկուզ տուրիստական գործակալություններն էլ պիտի հասկանան, որ քաղաքացիները, հատկապես երիտասարդները, որոշել են, որ իրենք գոնե այս տարի չպետք է իրենց հանգիստը կազմակերպեն Թուրքիայում»:
Մեր այն դիտարկմանը, թե առաջինը հենց պատգամավորներն են Թուրքիայում ակտիվ հանգստացողների շարքում, պարոն Ավագյանն արձագանքեց. «Չեմ առանձնացնի՝ պատգամավորները. շատ-շատ քաղաքական գործիչներ, տարբեր կուսակցությունների ներկայացուցիչներ իրենց հանգիստն անցկացնում են Թուրքիայում: Ես անձամբ իմ մասով կարող եմ ասել, որ չեմ հանգստացել ու չեմ էլ պատրաստվում հանգստանալ Թուրքիայում: Չնայած հանգիստը կազմակերպելու առաջին հայացքից ավելի հարմար տարբերակ է, ինչպես շատ խոսում են հատկապես գների հետ կապված, ես ինձ ու իմ ընտանիքին զերծ եմ պահել հանգիստը Թուրքիայում կազմակերպելուց»:
Ըստ ՀՀԿ-ականի՝ առաջին հայացքից սա կարող է ոչ այնքան խնդրահարույց հարց թվալ, բայց «իրականում, երբ մի փոքր հետամուտ ես լինում և ուսումնասիրում ամբողջ ծավալները, հասկանում ես, որ ուղղակի մեծ ծավալներով գումար մեր երկրից դուրս է գալիս Թուրքիա»:
Կարդացեք նաև
Մեր այն հիշեցմանը, թե Թուրքիայում հանգստացող շատ պատգամավորներ փորձում են հավաստիացնել, որ դա հայրենասիրության հետ կապ չունի, պարոն Ավագյանն այսպես արձագանքեց. «Իրենք ֆինանսավորում են այնտեղի տուրիստական գործակալություններին, համապատասխան հյուրանոցային համալիրներին, գումար են այնտեղ թողնում, որոշակի տնտեսական գործընթացների մասնակցություն ունենում, ու եթե ֆինանսավորումը իրենց համար կապ չունի և դա իրենց համար հայրենասիրության տարրեր չի պարունակում, դա իրենց խնդիրն է: Չգիտեմ՝ իրենք հայրենասիրությունը ոնց են հասկանում»:
Տաթև ՀԱՐՈՒԹՅՈՒՆՅԱՆ
Փուչիկային հայրենասիրություն: Իսկական հայրենասերները, իհարկե, պետք է հանգստանան Դուբայում:
Միագամից ,,Առավոտը,, համարեք հհկ օրգան և մի տանջեք ձեզ` գրառումներ ,,ջնջելով,, ….
Հարգելի Գայանե, մենք չենք ջնջում գրառումները, եթե դրանք համապատասխանում են մեր կայքում մեկնաբանություններ հրապարակելու կանոններին, եւ մասնավորապես՝ չեն պարունակում վիրավորանքներ: Փորձեք Ձեր տեսակետը շարադրել առանց անձնական վիրավորանքների: