«2015 թվականը հայերի համար բավականին անհանգիստ է լինելու»,- հունվարի 30-ին, «Փաստարկ» մամուլի ակումբում լրագրողների հետ հանդիպման ընթացքում ասաց «Եվրոպական ինտեգրացիա» հասարակական կազմակերպության նախագահ Կարեն Բեքարյանը:
Նրա խոսքերով՝ տպավորություն կա, որ Թուրքիան Ադրբեջանի միջոցով շարունակելու է սադրել, որպես ուշադրություն շեղի. «Չկա որեւէ վստահություն, որ սադրանքները եւ այդ ամբողջ ապակայունացման գործընթացը դադարելու են ապագայում: Կարող է մենք դա ամբողջությամբ զգանք: Եթե սա այն տարածքում է մնում, որում կա այսօր, դա ի պատիվ բանակի է»:
Անդրադառնալով 2015 թվականի բանակցային գործընթացներին՝ պարոն Բեքարյանն ասաց, որ դրանից որեւէ դրական ակնկալիք չունի. «Սա պայմանավորված է մի շարք պարզ իրողություններով, որովհետեւ կարծում եմ ոչ միայն մենք, այլեւ առաջարկ ներկայացնող համանախագահները հստակ հասկանում են, որ մադրիդյան սկզբունքներին իրական կյանքի հետ օր օրի դադարում են առնչություն ունենալ, որովհետեւ հնարավոր չէ խոսել զիջումների մասին այն պարագայում, երբ քո հարեւանը կամ բանակցող կողմը որպես թշնամի է դիտարկում համայն հայությանը եւ դնում է հայությանը ոչնչացնելու խնդիրը՝ Հայաստան-Ադրբեջան եւ Լեռնային Ղարաբաղի Հանրապետություն-Ադրբեջան սահմանային գոտիներում, սա վերածվում է աբսուրդի»:
Ամի ՉԻՉԱԿՅԱՆ
