Վերաքննիչ Քրեական դատարանում «Ցեղակրոն» կուսակցության նախագահ Շանթ Հարությունյանի միջնորդությունը այսօր վիճաբանության առիթ դարձավ: Նա միջնորդում էր, որ իրենց վրայից վերացնեն խուլիգանության հոդվածը ու առաջ քաշեն ինքնապաշտպանության հանգամանքը: Դատավորը մի քանի անգամ հիշեցրեց, որ վերաքննիչ բողոքը դրա մասին չէր ու հիմա նա չի կարող ինչ ուզի, պահանջի: Դիտողություն արեց խոսել ըստ էության: Բայց Շանթ Հարությունյանն ավելի բորբոքվեց. «Սերժ Սարգսյանը՝ նույն ինքը KGB-ի գործակալը, հատուկ հրահանգով գործ սարքեց իմ ու ընկերներիս գլխին: Մենք խուլիգաններ չենք, մենք պայքարել ենք հանուն ժողովրդի շահերի, նրանց իրավունքների, մենք ինքնապաշտպանվել ենք ոստիկանների հարձակումներից»:
Սերժ Սարգսյանի հասցեին ուղղված Շանթ Հարությունյանի հայտարարությունները հունից հանեցին եռանախագահող դատավորներին, ամեն մեկն իր տեղից մի բան հորդորում էր, պահանջում էին վերջ տալ, նստել:
«Թողեք իմ միջնորդությունն անեմ, ավարտեմ»,- բղավեց Շանթ Հարությունյանը:
«Էս ինչ հիվանդ ես, որ սկսել ես բղավել»,- հակադարձեց դատավորը:
Կարդացեք նաև
Հիշեցնենք, որ Շանթ Հարությունյանն այսօր դատարանում բողոքում էր առողջական վիճակից, ու նիստը հետաձգվեց, նրա համար շտապ օգնություն կանչեցին:
«Այս ամբիոնը մի օգտագործեք քաղաքական իշխանության հասցեին հայտարարություններ անելու համար: Չի կարելի, հարգանք ունեցեք նախագահի, դրոշի, զինանշանի նկատմամբ»,- մեկը մյուսին հերթ չտալով՝ ասում էին դատավորները:
«Բայց հայրենիքի դավաճանը ինչ կապ ունի հարգանքի հետ: Ես նրան չեմ վիրավորում, ապացուցում եմ, որ նա Հայաստանի նկատմամբ դավաճանություն է գործել: Էդ մարդը հեռուստատեսությամբ հայտարարել է, որ հպարտ է իր սովետական անցյալով, իսկ իր անցյալում եղել է Ադրբեջանի KGB-ի գործակալ: Ինքը Ադրբեջանից հանձնարարություն է ստացել՝ Շանթին ու ընկերներին ձերբակալի, մեր գլխին սարքի: Գնացեք, քննություն արեք, էդ մարդը Ադրբեջանից հատուկ պատվեր է կատարել»,- շարունակեց Շանթ Հարությունյանը:
Դատավորներին չհաջողվեց սաստել Շանթ Հարությունյանին, նրանք հեռացան՝ կիսատ թողնելով Շանթի ելույթը:
Հիշեցնենք, որ Շանթ Հարությունյանն ու ընկերները Վերաքննիչ քրեական դատարանում բողոքարկում են առաջին ատյանի դատարանի որոշումը՝ խուլիգանության հոդվածով իրենց ազատազրկման դատապարտելու մասին:
Արփինե ՍԻՄՈՆՅԱՆ
Հիրավի սա դարակազմիկ դատավարություն է, որի ականատեսն ենք մենք, և ամենաշատը դու, Արփինե ջան…
Երանի քեզ, որ այդքան մոտիկից տեսնում ես այդ մեծ մարդուն և իր շուրթերից լսում նրա մտքի գոհարները… կանցնեն դեռ շատ տարիներ, մինչև մարդկությունը հասկանա, թե ով էր Շանթը..)))))))
Կարևորը որ սերժն է մնալու մարդկության պատմության մեջ:Առանց նրա Հայաստանը չէր վերանա: