ՀՀ ոստիկանությունը հայց է ներկայացրել Աստղիկ Խաչատրյանի դեմ՝ նրան վարչական պատասխանատվության ենթարկելու պահանջի մասին։
Դատարանը պահանջը բավարարել էր եւ 50 000 դրամ տուգանքի դատապարտել Ա.Խաչատրյանին:
Ոստիկանները հայտնել էին, թե 2014 թ.փետրվարի 14-ին, ժամը 11.30-ին ՀՀ ոստիկանության Երևան քաղաքի վարչության ՊՊԾ գնդի 2-րդ գումարտակի 1-ին վաշտի ծառայողները Բաղրամյան -26 հասցեում գտնվող` ՀՀ նախագահի նստավայրի մոտ, հասարակական կարգի պահպանության և հասարակական անվտանգության ապահովման ծառայություն իրականացնելիս, նախագահի նստավայրի «անմիջապես դարպասների մոտ» նկատել են մի քաղաքացուհու` Աստղիկ Խաչատրյանին: Վերջինը հայտարարել է, որ բողոքի ակցիա է իրականացնում։ Ոստիկանության ծառայողները նրանից պահանջել են փոքր ինչ հեռանալ դարպասների մոտից, սակայն Աստղիկ Խաչատրյանը կտրականապես հրաժարվել է կատարել ոստիկանության ծառայողների պահանջները։
Ա.Խաչատրյանը բողոք էր բերել ՀՀ վարչական վերաքննիչ դատարան:
Կարդացեք նաև
Նա դատավոր Ա.Առաքելյանին ինքնաբացարկի միջնորդություն էր արել:
Միջնորդության համաձայն, փետրվարի 25-ին դատական նիստի ընթացքում Աստղիկ Խաչատրյանի կողմից միջնորդություն է ներկայացվել նախագահող դատավոր Ա.Առաքելյանին և դատական կազմի դատավոր Գ.Ղարիբյանին ինքնաբացարկ հայտնելու մասին, որի կապակցությամբ նիստն ընդհատվել էր 3 օրով :
Դատավոր Ա.Առաքելյանի վերաբերյալ` որպես հիմնավորում նշվել էր, որ Ա.Առաքելյանը հանդիսացել է Ա.Խաչատրյանին` իբր անհիմն աշխատանքից ազատելու մեջ մեղավոր անձ` Քանաքեռ-Զեյթուն վարչական շրջանի իրավաբանական բաժնի նախկին պետ Հ.Կարապետյանի ընկերը և գործընկերը։
Դատավորը իր որոշմամբ մերժել է այս միջնորդությունը, միաժամանակ փաստելով.«ՀՀ վարչական դատավարության օրենսգրքի 13-րդ հոդվածի համաձայն` դատավորի ինքնաբացարկի հետ կապված հարաբերությունների վրա տարածվում են Հայաստանի Հանրապետության քաղաքացիական դատավարության և Հայաստանի Հանրապետության դատական օրենսգրքերի համապատասխան նորմերը։
ՀՀ քաղաքացիական դատավարության օրենսգրքի 21-րդ հոդվածի 1-ին մասի համաձայն` դատավորի ինքնաբացարկի հիմքերը uահմանվում են Հայաuտանի Հանրապետության դատական oրենuգրքի 91 հոդվածով»։
Այդ հիմքերի մեջ նշվել էր ինքնաբացարկի հիմքերը , մասնավորապես, երբ
դատավորը կանխակալ վերաբերմունք ունի որպես կողմ հանդես եկող անձի, նրա ներկայացուցչի, պաշտպանի, դատավարության այլ մասնակիցների նկատմամբ. որպես մասնավոր անձ, ականատես է այն փաստերին, որոնք վիճարկվում են դատաքննության ընթացքում. դատավորը կամ նրա ամուսինը կամ նրանց հետ արյունակցական` մինչև 3-րդ աստիճանի կապի մեջ գտնվող անձը ողջամտորեն կհանդիսանա»:
Ըստ դատարանի, միջնորդությունը ենթակա է մերժման, նաև այն հիմքով, որ «Հ. Կարապետյանի հետ Ա.Առաքելյանի հարաբերությունները ոչ մի կապ չունեն Աստղիկ Խաչատրյանին ՀՀ ոստիկանության հայցով վարչական պատասխանատվության ենթարկելու խնդրի հետ»:
Դատական հաջորդ նիստը նշանակվել է մարտի 17-ին:
Ռուզան ՄԻՆԱՍՅԱՆ
