Թուրքագետ Անդրանիկ Իսպիրյանի գնահատմամբ, Եվրախորհրդարանի կողմից նախօրեին ընդունված Հայոց ցեղասպանությունը դատապարտող բանաձեւի պտուղները Հայաստանը տարիներ հետո կքաղի:
«Ճիշտ է՝ այն չունի իրավական ուժ ու որեւէ բան չի կարող պարտավորեցնել Թուրքիային, բայց այն հող կնախապատրաստի հետագայում թուրքական իշխանություններին որոշակի պարտավորվածություն տալու համար»,- Aravot.am-ին ասաց թուրքագետը:
Նրա խոսքով, բանաձեւի բոլոր կետերը կարեւոր ու լավ մշակված էին, եւ Եվրախորհրդարանի այդ որոշումը թուրքական դիվանագիտության ծանր պարտությունն էր. «Թուրքիան կորցրել է վերահսկողությունը ցեղասպանության ճանաչման դեմ պայքարում, արդեն հայտնի է, որ թուրքական կողմը բավականին լուրջ պատրաստվում է Օբամայի վարչակազմին համոզել, որ կանխեն ապրիլի 24-ին Օբամայի ՝ցեղասպանություն եզրույթի հնարավոր արտաբերումը»:
Թուրքագետի դիտարկմամբ, Թուրքիան թեւաթափ է եղել հայկական հարցի վերաբերյալ միջազգային հանրության արձագանքից, ու եթե ԵԽԽՎ-ի կողմից բանաձեւի ընդունումը սպասելի էր, ըստ նրա, թուրքերը չէին էլ պատկերացնում ՝ Վատիկանը նման հայտարարություններ կանի. «Եվրախորհրդարանի բանաձեւի ընդունումը սպասելի էր, որովհետեւ մեկ օր առաջ Եվրախորհրդարանի փոխնախագահը բաց տեքստով ասաց, որ դատում են ոչ թե այսօրվա Թուրքիային, այլ Օսմանյան կայսրությանը, այսինքն` հստակ ակնարկեցին՝ բանաձեւն ընդունվելու է: Թուրքիան պատրաստ էր դրան եւ իզուր չէ, որ Ղազախստան մեկնելուց առաջ Էրդողանն ասաց՝ մեր մի ականջից կմտնի, մյուս ականջից դուրս կգա: Չնայած թուրքական իշխանությունների քննադատող պատասխաններին, ակնհայտ է՝ նրանք թեւաթափ են եղել ու իրենց հայտարարությունները ոչինչ չասող հայտարարություններ են, իրենց վասող քայլեր»:
Կարդացեք նաև
Արփինե ՍԻՄՈՆՅԱՆ
