Ապրիլի 21-ին Փորձաքննությունների ազգային բյուրոյի կոնֆերանսների դահլիճում տեղի ունեցավ «Փորձաքննությունը քաղաքացիական գործերով դատական վարույթի շրջանակներում» թեմայով կոնֆերանս, որին ներկա էին դատական, դատախազական, փաստաբանական, փորձագիտական, բուհական, ինչպես նաև այլ ոլորտների ներկայացուցիչներ:
Բացման խոսքով հանդես եկավ Փորձաքննությունների ազգային բյուրոյի տնօրեն Արտաշես Ջավադյանը: «Փորձաքննությունը քաղաքացիական գործերով դատական վարույթի շրջանակներում» գիտական թեմայի ղեկավար, ՀՀ կառավարման ակադեմիայի իրավագիտության ամբիոնի վարիչ, իրավաբանական գիտությունների թեկնածու, դոցենտ Արմեն Եզեկյանը Միջոցառման ընթացքում ներկայացրեց նշված վերտառությամբ ուսումնական ձեռնարկը, որն առաջինն է ՀՀ-ում: Ելույթներով հանդես եկան ձեռնարկի համահեղինակներ Գայանե Սահակյանը և Դիանա Ջավադյանը:
Արծարծվեցին դատական փորձաքննության էությանը, փորձաքննության նշանակմանը քաղաքացիական դատավարությունում, փորձագետի եզրակացության գնահատման առանձնահատկությունները ՀՀ-ում և արտերկրներում:
Ուսումնական ձեռնարկն, անշուշտ, կօժանդակի ոչ միայն ուսանողներին, այլ նաև ոլորտի պրակտիկ մասնագետներին: Այն, քաղաքացիա-դատավարական օրենսդրության բարեփոխումների համատեքստում, օգտակար կլինի նաև դրա կատարելագործման հարցերում:
Բյուրոյի տնօրեն Ա. Ջավադյանը և կառավարման ակադեմիայի իրավագիտության ամբիոնի վարիչ Ա. Եզեկյանը համոզմունք հայտնեցին, որ աշխատանքները կլինեն շարունակական:
Փորձաքննությունների ազգային բյուրոյի մամուլի պատասխանատու Լանա Մշեցյան
