Եվրամիությունը հարգում է «Արեւելյան գործընկերության» ծրագրի ցանկացած մասնակից-պետության իրավունքը՝ պահպանելով ԵՄ-ի հետ համագործակցությունը, փնտրել զարգացման սեփական ուղիները: Այս մասին, ըստ ռուսական «Ria» գործակալության, ելույթ ունենալով Գերմանիայի խորհրդարանում, հայտարարել է այդ երկրի կանցլեր Անգելա Մերկելը:
«Մենք հարգում ենք Հայաստանի որոշումը, որը ԵՄ-ի հետ ինտենսիվ բանակցություններից բացի, փնտրում է ավելի սերտ տնտեսական կապեր Ռուսաստանի եւ ԵՏՄ-ի հետ: Մենք նաեւ հարգում ենք Ադրբեջանի դիրքորոշումը, որ ԵՄ-ին անդամակցելու ուղիներ դեռ չի փնտրում եւ ԵՏՄ-ում իր համար դեր չի տեսնում: Մենք նաեւ պատրաստ ենք շարունակել Բելառուսի հետ երկկողմ համագործակցությունը, չնայած բացահայտ հակասություններին»,- ասել է նա:
Մերկելը նշել է, որ «Արեւելյան գործընկերության» ձեւաչափը ԵՄ-ի ընդլայնման գործիք չէ: «Մենք չպետք է արհեստական սպասելիքներ ունենանք, որոնք մենք չենք կարողանալու իրականացնել: Մենք գիտենք այդ մասին, ես փորձում եմ դա հասցնել մեր արեւելյան գործընկերներին»:
Անգելա Մերկելը եւս մեկ անգամ հայտարարել է, թե «Արեւելյան գործընկերությունն» ուղղված չէ երրորդ կողմի, առաջին հերթին՝ Ռուսաստանի դեմ:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
