ԵՀՄՖ Նախագահությունը խստիվ դատապարտում է Երևանում խաղաղ բնակչության կողմից Էլեկտրաէներգիայի թանկացման դեմ կազմակերպված բողոքի ամենաժողովրդավարական ձևով արտահայտված խաղաղ ցույցի ցրումը ոստիկանության կողմից:
ԵՀՄՖ ղեկավարությունը դեռ 2015 թվականի փետրվար ամսին զգուշացրել էր ՀՀ վարչակազմին Հայաստանում ձևավորված ներքին քաղաքական լարված մթնոլորտի շուրջ և դիմել էր նամակով ՀՀ նախագահին, պատճեն ուղղելով Վեհափառ հայրապետին, ԱԺ նախագահին, վարչապետին, Սահմանադրական դատարանի նախագահին և գլխավոր դատախազին, զգուշացնելով, որ ևս մեկ ,,մարտի 1,,-ը լինելու է կործանարար:
Նախագահի կողմից փետրվարյան գործընթացներին տրվեցին ավելի քան տարօրինակ և հակասահմանադրական լուծումներ, որի արդյունքում նախատեսված փետրվարյան ցույցերը հետաձգվեցին, իսկ ներքին քաղաքական լարվածությունն առավել շիկացավ: Այսօր ժողովրդի աննախադեպ լարված սոցիալական վիճակը հուշում է, որ պայթյուն է տեղի ունենալու: Ժողովրդի սահմանադրական իրավունքների ոտնահարումը, խաղաղ բնակչության նկատմամբ բիրտ ուժի կիրառումը և վարչակազմի ցինիկ վերաբերմունքը ՀՀ արժանապատիվ քաղաքացիների հանդեպ, հղի է լուրջ վտանգներով և առաջինը սպառնալու է մեր երկրի անվտանգությանը:
ԵՀՄՖ Նախագահությունը պահանջում է վարչակազմի ղեկավարությունից օրենքի խստությամբ պատժել այսօր առավոտյան խաղաղ բնակչության նկատմամբ ուժ կիրառած ոստիկանապետին և այլ մեղավոր անձանց: ԵՀՄՖ Նախագահությունը մեկ անգամ ևս հիշեցնում է, որ 2008-ի մարտի 1-ի դեպքերը ղեկավարած հանցագործները չեն պատժվել: Այսօրվա իրավիճակը ստիպում է հրատապ անդրադառնալ արդարադատությունը հաստատող անավարտ գործընթացների վերականգմանը և ՀՀ Սահմանադրությամբ ամրագրված ժողովրդի իշխանության վերականգմանը:
Եվրոպահայությունը ակընդետ հետևում է Հայաստանում ընթացող գործընթացներին և արձագանքելու է դրանց ընթացքին, ընդհուպ տարբեր հնարավոր եղանակներով մասնակցելով նրանց զարգացումներին:
ԵՀՄՖ Նախագահություն
