Լրահոս
Օրվա լրահոսը

Երևանից զորակոչված 43 ժամկետային զինծառայողներ 5-օրյա և 10-օրյա արձակուրդով Երևանում են

Հունիս 30,2015 18:35

Բանակ-հասարակություն կապն առավել ամրապնդելու և ծառայության մեջ աչքի ընկած զինվորներին խրախուսելու նպատակով Երևանի քաղաքապետարանի և ՀՀ պաշտպանության նախարարության միջև ձեռք բերված համաձայնության արդյունքում մայրաքաղաքից զորակոչված ժամկետային զինծառայողներին կարճաժամկետ արձակուրդի հնարավորություն է ընձեռվում։ Երևանի Նոր Նորք վարչական շրջանից զորակոչված 43 ժամկետային զինծառայողներ 5-օրյա և 10-օրյա արձակուրդով հունիսի 30-ից Երևանում են։

«Արդեն բարի ավանդույթ է դարձել, որ Երևանի քաղաքապետարանի և ՀՀ Պաշտպանության նախարարության նախաձեռնությամբ ու սերտ գործակցությամբ մեծ ծրագիր ենք իրականացնում՝ բանակ-հասարակություն կապն ամրապնդելուն ուղղված։  Տարին առնվազն երկու անգամ մեր զինծառայողների ծնողներին ուղեկցում ենք սահմանամերձ զորամասեր՝ տեղում իրենց զավակներին հանդիպելու: Նախորդ տարվանից սկսած, նախարարության հետ համագործակցելով, սկիզբ դրեցինք նաև մի նոր գեղեցիկ ավանդույթի, և ծառայության մեջ աչքի ընկած մեր զինվորները կարճատև արձակուրդի հնարավորություն են ստանում և հարազատ քաղաքում են հանդիպում իրենց հարազատներին: Հաջողված այս համագործակցության համար առանձնակի շնորհակալությունս եմ հայտնում ՀՀ Պաշտպանության նախարարին և վստահեցնում եմ, որ այս ծրագիրը լինելու է շարունակական։ Նաև շնորհակալ եմ բոլոր այն ծնողներին, ովքեր դաստիարակել են քաջ զավակներ, որոնց շնորհիվ մեր սահմաններն այսօր ամուր են ու անառիկ: Ձեզ էլ բարի ծառայություն եմ մաղթում, տղե՛րք ջան: Միշտ հիշեք, որ մենք հպարտ ենք ձեզանով և համոզված եմ, որ ի դեմս ձեզ՝ մենք ունենք արժանի սերունդ, ովքեր պատվով ու պատասխանատվությամբ նաև կշենացնեն մեր երկիրը»,- նշել է Երևանի քաղաքապետ Տարոն Մարգարյանը, ապա շնորհակալություն հայտնել նաև հանդիպմանը ներկա ՀՀ Գեղարքունիքի մարզի մարզպետ Ռաֆիկ Գրիգորյանին և ՀՀ ՊՆ երկրորդ կորպուսի հրամանատար Պողոս Պողոսյանին՝ զինվորականների այցը նախապատրաստելուն աջակցության համար։

Այնուհետ, ի նշան երախտագիտության, Երևանի քաղաքապետ Տարոն Մարգարյանը «Երևանի զինանշան» հուշամեդալներով է պարգևատրել Գեղարքունիքի մարզպետ Ռաֆիկ Գրիգորյանին՝ Երևանի համայնքի և Գեղարքունիքի մարզի միջև համագործակցության ընդլայնման համար, և ՀՀ ՊՆ երկրորդ կորպուսի հրամանատար Պողոս Պողոսյանին՝ Հայրենիքի սահմանների պաշտպանության գործում ունեցած ներդրման համար։ Շուրջ երկու տասնյակ սպաներ էլ պարգևատրվել են Երևանի քաղաքապետի շնորհակալագրով։

Զինծառայող որդիների հետ պարբերաբար հանդիպումներ կազմակերպելու համար Երևանի քաղաքապետին ու ՀՀ Պաշտպանության նախարարին ուղղված շնորհակալական խոսք են ասել նաև զինծառայողների ծնողները՝ նշելով, որ այսկերպ սատարումը առավել ամուր ու մարտունակ է դարձնում մեր սահմանների այսօրվա պաշտպան իրենց որդիներին։

Երեւանի քաղաքապետարան

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունիս 2015
Երկ Երե Չոր Հնգ Ուրբ Շաբ Կիր
« Մայիս   Հուլ »
1234567
891011121314
15161718192021
22232425262728
2930