Բաղրամյան պողոտայում մնացածները իրենց կայքն են ստեղծել

Բաղրամյան պողոտայում մնացածները իրենց կայքն են ստեղծել

Պատասխանելով «Սիվիլնեթի» այն հարցին, թե Բաղրամյան պողոտայում հավաքված ցուցարարները հանրային քննարկման արդյունքում ինչ որոշեցին, քաղաքացիական ակտիվիստ Զարուհի Հովհաննիսյանն ասաց. «Երկրորդ օրն է հանրային քննարկումը տեղի է ունենում հենց Բաղրամյան պողոտայում եւ մեր խնդիրն այն է, որ ապահովենք քաղաքացիների մաքսիմալ մասնակցությունն ու ներդրումը»:

Ակտիվիստը ավելացրեց, որ իրենք ցանկանում են տարածքը կազմակերպել այնպես, որ տեղի ունեն թե մասնագիտական քննարկումներ, թե հանրային քննարկումներ, ինչպես նաեւ մշակութային, կրթական միջոցառումներ: «Մեր ցանկություն է նաեւ տեղեկատվական դաշտը թափանցիկ պահել եւ հանրությանը հասցնել այն ամբողջ ինֆորմացիան, որը ճիշտ է»:

Զարուհին նշեց, որ երեկվանից արդեն գործում է տեղեկատվական խումբը, ունեն նաեւ սեփական կայքէջ «Electric Yerevan» անունով, որտեղ տեղադրվում են այն հոդվածները, որոնք վերաբերում են շարժմանը: «Միեւնույն ժամանակ այդ խումբը աշխատում է նաեւ, որպեսզի տեղեկատվությունը տարածի սոցցանցերում: Կա հետազոտական խումբ, որտեղ սոցիոլոգներն են հիմնականում աշխատում, նրանք արդեն սոցհարցման համար հարցաթերթիկներ են պատրաստել»:

Բացի վերոնշյալ խմբերից, ըստ Զարուհի Հովհաննիսյանի, այսօր հիմնվել է նաեւ իրավաբանական խումբը, որը իրավական օգնություն ցույց կտա նստացույցի մասնակիցներին, կզբաղվի նրանց իրավական հարցերով: «Այստեղ հիմնվել է նաեւ մշակութային միջոցառումների կազմակերպման խումբը, հիմնվել է հանրային, մասնագիտական քննարկումների խումբը»:

Նա ասաց, որ կա գիշերակացի խումբը, որը փորձում է համակարգել, մարդկանց եւ ասել, թե ինչքան կարող են մնալ, որպեսզի չհոգնեն:

Աշոտ ԻՍՐԱԵԼՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք