Հանրային խորհուրդն «Արմենիա միջազգային օդանավակայաններ» ՓԲԸ-ի (կոնցեսիոներ) կողմից ներկայացված` «Զվարթնոց» օդանավակայանի առաջիկա 5 տարիների զարգացման շրջանակներում ուղևորային համալիրը վերափոխելու նոր առաջարկի վերաբերյալ իր տեսակետը կհայտնի առաջիկա օրերին:
Հուլիսի 22-ին փոքր խորհրդի նիստում քննարկվել է Հանրային խորհրդի որոշման նախագիծը: Քննարկմանը մասնակցել են նաև ՀԽ քաղաքաշինության ենթահանձնաժողովի նախագահ Գրիգոր Ազիզյանն ու վաստակավոր ճարտարապետ Սաշուր Քալաշյանը:
Ներկաները նախ հիշեցրել են, որ Քաղավիացիայի գլխավոր վարչությունը 2013 թվականին դիմել էր Հանրային խորհուրդ` քննարկելու համալիրի քանդման հարցը, որի վերաբերյալ հանրային բազմաթիվ քննարկումներից հետո խորհուրդը բացասական դիրքորոշում էր հայտնել:
Կոնցեսիոների ներկայացրած նոր առաջարկը, որով մասնակիորեն պահպանվում է հին ուղևորային համալիրը, նույնպես մի քանի անգամ քննարկման է դրվել Հանրային խորհրդում` այդ թվում նաև «Արմենիա միջազգային օդանավակայաններ» ՓԲԸ ենթակառուցվածքների մենեջեր Լուկաս Պերես Մոնսալոյի մասնակցությամբ: Քննարկումների ժամանակ ճարտարապետները բացասական դիրքորոշում են հայտնել նաև կոնցեսիոների ներկայացրած նոր առաջարկի վերաբերյալ` նշելով, որ դեռևս կան չքննարկված տարբերակներ հին ուղևորային համալիրն ամբողջությամբ պահպանելու վերաբերյալ:
Կարդացեք նաև
ՀԽ նախագահ Վազգեն Մանուկյանը հանձնարարել է ստեղծել աշխատանքային խումբ, որն առաջիկա օրերին կվերամշակի և կամբողջացնի որոշման նախագիծը, այնուհետև այն կդրվի քվեարկության:
Հանրային խորհրդի փոքր խորհուրդն, ըստ օրակարգի հաջորդ հարցի, քննարկել է Հայաստանի ավիացիայի ոլորտի խնդիրները: Վազգեն Մանուկյանը ներկայացրել է հուլիսի 17-ին վարչապետի հետ հանդիպման և ավիացիայի վերաբերյալ տեղի ունեցած քննարկման մանրամասները:
ՀԽ նախագահը ևս մեկ անգամ կարևորել է ավիացիայի ոլորտի զարգացումն ու հայրենական ավիափոխադրողներ ունենալու անհրաժեշտությունը` հատկապես Հայաստանի ներկա պայմաններում, երբ երկիրը չունի ելք դեպի ծով, գտնվում է բարդ աշխարհաքաղաքական իրավիճակում, և աշխարհի հետ հաղորդակցվելու միակ ճանապարհը ավիացիան է. «Սա պետք է գերխնդիր լինի Հայաստանի իշխանությունների համար»,-ասել է Մանուկյանը` նշելով, որ ՀՀ կառավարությունը հնարավորինս արագ պետք է մշակի հստակ ռազմավարություն ավիացիայի վերաբերյալ:
ՀԽ անդամ Արմեն Տեր-Տաճատյանը նույնպես կարևորել է կառավարության կողմից ոլորտը գերակա ճանաչելու հարցը և ոլորտի զարգացման ծրագրի մշակումը, որի իրականացման գործում պետք է ներգրավվեն նաև մասնագետներ հասարակական հատվածից:
ՀԽ անդամը կարևորել է նաև ավիացիայի ոլորտում ստեղծված իրավիճակին և դրա պատճառներին հստակ գնահատականներ տալու, ինչպես նաև կադրային փոփոխություններ իրականացնելու հարցը:
Վազգեն Մանուկյանը, ամփոփելով քննարկումը, հայտնել է, որ առաջիկայում Հանրային խորհուրդը ավիացիայի հարցերը կքննարկի նաև հանրապետության ղեկավարի հետ:
Օրակարգի վերջին հարցը վերաբերել է Սահմանադրության 1-ից 7-րդ գլուխների նախագծին: Հարցը ներկայացրել է ՀԽ անդամ Արշակ Սադոյանը, որից հետո ծավալվել է քննարկում:
Անդրադառնալով նախագծում առկա որոշակի դրական փոփոխություններին` այնուամենայնիվ, ՀԽ անդամներն արձանագրել են, որ նախագիծն ընդհանուր առմամբ բավականին բարդ է, պարունակում է բազմաթիվ խնդրահարույց և անորոշ հարցեր, ուստի երկարատև և մասնագիտական լուրջ քննարկումների կարիք ունի:
Վազգեն Մանուկյանն առաջարկել է Հանրային խորհրդում սկսել նախագծի վերաբերյալ հանրային քննարկումների շարք:
Հանրային խորհուրդ
