ԱԱԾ քննչական վարչության պետի տեղակալ Միքայել Համբարձումյանն այսօր «Արմենպրես» մամուլի սրահում անդրադարձավ կազմակերպված հանցավոր խմբակցության ձերբակալության գործողություններին: Նա ասաց, որ արդեն գրավոր ցուցմունքներ ունեն, թե այդ խումբն ինչ գործողություններ է ծրագրած եղել:
Նախ` լրագրողների դիտարկմանը, որ դուք անմիջապես չեք մտել, ինչո՞վ եք բացատրում այն, որ դիմադրություն չի եղել հանցավոր խմբի կողմից, կադրերում երեւում է, դուք ինչպես եք մտել՝ նա պատասխանեց. «Դուք սխալվում եք, ամբողջ միջոցառումը տեւել է վայրկյաններ: ԱԱԾ եւ ոստիկանության համատեղ ուժերն այդ գրոհը մանրակրկիտ ուսումնասիրել են: Գիտեք, բնակարան մտնելը, տարբեր սենյակներում գտնելը զինված մարդկանց, դա ուղղակի բարձր պրոֆեսիոնալիզմի արդյունք է»:
Հարցին՝ ԱԱԾ-ն փոխհատուցելո՞ւ է առանձնատանը հասցված վնասը՝ նա ասաց, որ վնասի չափը հաշվարկվում է, եւ վնասի փոխհատուցման չափը լուծվելու է համապատասխան ընթացակարգով:
Թե հանցավոր խումբը զենքերը որտեղի՞ց է ստացել՝ նա պատասխանեց. «Մենք այդ ուղղությամբ մանրակրկիտ քննություն ենք կատարելու: Ձեռք բերված եւ հայտնաբերված զենքը խմբին չի բավարարել, պատրաստ են եղել բավականին խոշոր գումար վճարելու՝ այլ աղբյուրներից զենք ձեռք բերելու: Այսօր ստանում ենք ցուցմունքներ, եթե գտնենք մարդիկ, որոնք կապ ունեն հանցագործության հետ, կընդգրկեն քրգործում»:
Կարդացեք նաև
ԱԱԾ աշխատակիցն ասաց, որ ճիշտ են այն տեղեկությունները, որ այդ խմբի՝ բնակարանի վարձակալության ժամանակն ավարտվելու էր 3 օրից, եւ օրեր անց խումբը գործելու էր եւ իրականացնելու էր իր հանցավոր մտադրությունը:
Հարցին՝ որքա՞ն ժամանակ է խումբը եղել ձեր հսկողության տակ՝ նա ասաց. «Արթուր Վարդանյանը ՀՀ-ից մեկնել է, բնակություն է հաստատել Իսպանիայում, հետո եկել է Հայաստան: 2015-ի ապրիլից գտնվել է ՀՀ տարածքում, արդեն ձեւավորվել է խումբը, պրոցեսների ընթացքում ԱԱԾ-ի տեսադաշտում է արդեն հայտնվել: Խումբն ամեն ինչ արել է, որ չհայտնվի տեսադաշտում, որ խումբը չբացահայտվի, չնկատվի, բայց դա նրանց չի հաջողվել»:
Aravot.am-ի դիտարկմանը, որ Արթուր Վարդանյանի հրապարակված ձայնագրության մեջ նա ասում է, որ գալիս է փրկելու հայ ժողովրդին այս իշխանություններից, եւ դրա արդյունքում սոցցանցերում նրան շատերը հերոսացնում են, համեմատում են Մոնթեի հետ՝ Միքայել Համբարձումյանն արձագանքեց. «Սպանություններ նախապատրաստող մարդուն ես չեմ կարող հերոսացնել»:
Մենք նաեւ հետաքրքրվեցինք՝ կոնկրետ Արթուր Վարդանյանը ինքնախոստովանական ցուցմունք տվե՞լ է, բայց Միքայել Համբարձումյանը չպատասխանեց:
Հռիփսիմե ՋԵԲԵՋՅԱՆ
