Ավելի վաղ հայտնել էինք, որ «Մխիթար Սեբաստացի» կրթահամալիրում այսօր սկսվել են մի շարք ստուգատեսների հայտերի ընդունումը: Մեկնարկը նշանավորվեց «Ղափամա» միջոցառմամբ: Կրթահամալիրի սաները եւ ծնողները «Ղափամա» էին պատրաստել եւ անուշեղենի հետ ցուցադրել առանձին տաղավարներում:
«Սա ավանդական միջոցառում է, ամեն տարի հավաքվում ենք եւ «Ղափամա» պատրաստում: Նախ, Սուրբ Երրորդություն եկեղեցու հոգեւոր հովիվն օրհնության կարգ է կատարում, ապա սկսվում է միջոցառումը»,-Aravot.am-ի հետ զրույցում ասաց կրթահամալիրի սան Էմմա Իսախանյանը:
Կարդացեք նաև
«Մենք բավականին կապված ենք ազգային ավանդույթների հետ: Ես եւ եղբայրս շատ ենք սիրում խոհարարությամբ զբաղվել, տարբեր ուտեստներ պատրաստել: Ինքներս հետաքրքիր բաղադրատոմսեր ենք գտնում եւ պատրաստում՝ նաեւ հայկական խոհանոցի ուտեստներ»,-հավելեց նա: Մեր զրուցակցի խոսքով՝ նմանօրինակ միջոցառումները նպաստում են, որպեսզի սաները եւ նրանց ծնողները ճանաչեն եւ պահպանեն ազգային ավանդույթները. «Մենք պետք է մեր մշակույթի կրողը լինենք»:
Միջոցառման ընթացքում կրթահամալիրի սաները եւ նրանց ծնողները ազգային պարեր պարեցին:
Լուսանկարները՝ Aravot.am-ի
Լուիզա ՍՈՒՔԻԱՍՅԱՆ
