Այս պահին Արմավիրի մարզի Ապագա գյուղի մշակույթի տանը ԼՂ մարտերում հակառակորդի գնդակից զոհված 27-ամյա Հովսեփ Կիրակոսյանի հոգեհանգստի արարողությունն է: Գյուղապետ Արտաշես Բարսեղյանի խոսքերով՝ մարդկանց հոսքն այնքան մեծ է, որ «տեղ ու դադար չկա»: Բոլորը գալիս են հերոսին հարգանքի տուրք մատուցելու եւ հրաժեշտ տալու:
Հովսեփն ունի երկու անչափահաս երեխա, մայր, հայր: Համայնքապետի նկարագրմամբ. «Հովսեփը շատ հայրենասեր, պարկեշտ ու խելացի մարդ էր, պարկեշտ ընտանիքի զավակ»:
Ավարտելով Վազգեն Սարգսյանի ռազմական ինստիտուտը՝ որպես պայմանագրային զինծառայող աշխատել է Ստեփանակերտում: Այսօր արդեն, ցուցաբերած արիության համար, հետմահու պարգեւատրվել մարտական խաչով:
Գյուղապետն ասաց, որ զոհված զինվորի ընտանիքին տասնյակ անհատներ ու կառույցներ դրամական աջակցություն են ցուցաբերել:
Մեր այն հարցին, թե որտե՞ղ է ամփոփվելու հերոսի աճյունը, Եռաբլուրո՞ւմ, գյուղապետ Բարսեղյանն ասաց. «Մենք արմատներով սասունցի ենք եւ ուզում ենք, որ մեր հերոսը մեր կողքին լինի»:
Կարդացեք նաև
Լուսինե ԲՈՒԴԱՂՅԱՆ