«Մեր երկրին այսօր որակապես նոր մարդիկ են պետք, ոչ թե այս գլխաքանակը: Միայն այդ դեպքում կարող ենք առանց արյան ու ցնցումների մեր երկրում համակարգային փոփոխություններ անել, հաղթել թուրքին, որն օրեցօր լկտիանում է, որովհետև մեր իշխանություններն այսքան ժամանակ աշխատել են միայն նրանց օգտին՝ երկիրը դատարկելով, թալանելով, ուրիշից կախման մեջ դնելով»,- «Հայելի» մամուլի ակումբում այսօր լրագրողների հետ հանդիպման ժամանակ այսպիսի տեսակետ արտահայտեց ազատամարտիկ Խաչատուր Խաչատուրյանը:
Նրա համոզմամբ՝ այն, ինչ կատարվում է մեր երկրում, բոլորիս մեղքն է. «Ոստիկանին ասում ես՝ հայ կնոջը մի հարվածիր, ասում է՝ հրաման եմ կատարում, ընտանիք եմ պահում, մանկավարժին ասում ես՝ ընտրությունները մի կեղծիր, ասում է՝ ընտանիք եմ պահում: Նույնը նաև դատախազը, դատավորը… և վերջում՝ ես, որ կարող է՝ վաղը կաշառք տամ, որպեսզի իմ այս կամ այն հարցը լուծեմ, որովհետև ընտանիք եմ պահում… Չեղա՞վ, որ մենք բոլորս ենք մեղավոր»,- նշեց ազատամարտիկը:
Դառնալով վերջին օրերի համախմբվածությանը՝ ազատամարտիկն ասաց. «Թող որևէ մեկը չփորձի խարխլել այս անգամվա միասնականությունը: Ես ինչքան էլ ատում եմ մեր իշխանություններին, այսօր նրանց դեմ չեմ ելնի»:
Սիրանուշ ՀԱՅՐԱՊԵՏՅԱՆ
