ԱԺ փոխնախագահ Էդուարդ Շարմազանովը ՀՀԿ գործադիր մարմնի նիստից հետո լրագրողներին ասաց, որ քննարկել են ներքին ու արտաքին քաղաքական հարցեր, անդրադարձ է եղել նաեւ ղարաբաղա-ադրբեջանական շփման գծում տիրող իրավիճակին, հնարավոր զարգացումներին:
Հարցին, թե լարվածության հնարավոր սրացումների նախադրյալնե՞ր կան մայիսի 9-ին ընդառաջ, պարոն Շարմազանովը պատմեց, որ ԱԺ-ում երեկ ՊՆ նախարար Սեյրան Օհանյանն ամբողջական ու պարզ տեղեկատվություն է տվել իրավիճակի մասին. «Մի բան պարզ է՝ քանի դեռ բանակցությունները չեն վերսկսել, ու ադրբեջանցիները շարունակում են կուտակումներ իրականացնել, պատրաստ պետք է լինենք բոլոր հնարավոր սցենարների: Ադրբեջանը ձգտում է խնդիրը լուծել ռազմական ճանապարհով, մի անգամ ադրբեջանական ծրագիրը ձախողեց, չեմ կարող այս պահին խոսել Ադրբեջանի ծրագրերի մասին: ՀՀ-ն ու Արցախը խնդրի խաղաղ կարգավորման կողմնակիցն են: Քառօրյա պատերազմը Ադրբեջանի ռազմատենչ իշխանության քաղաքականության արդյունք էր, ինչը ձախողեց:
Այս պահին թե տեսանք՝ թե ԱՄՆ պետքարտուղարը, թե ՌԴ ԱԳ նախարար Լավրովը, թե միջազգային հանրությունը մշտապես խոսել են զենքի ուժով խնդրի լուծման անթույլատրելիության մասին: Թե ռազմաճակատում, թե դիվանագիտական ճակատում պետք է ուժեղ լինենք: Ադրբեջանցիների ծրագիրը ապրիլի սկզբին չիրականացավ, թե հետագայում Ալիեւն ինչ կնախաձեռնի, չեմ կարող ասել, բայց որ մենք պետք է պատրաստ լինենք ցանկացած սցենարի, դա ակնհայտ է»:
Արփինե ՍԻՄՈՆՅԱՆ
