Այսօր ՀՀԿ ԳՄ նիստից հետո կուսակցության խոսնակ Էդուարդ Շարմազանովն ասաց, որ նիստում քննարկել են Ազգային Ժողովի քառօրյա նիստը, Ընտրական նոր օրենսգրքի նախագծին առնչվող խնդիրները:
Շարմազանովի խոսքերով՝ «Եվս մեկ անգամ արձանագրել ենք, որ քաղաքական ուժերը եւ առաջին հերթին քաղաքական մեծամասնությունը պատրաստակամ է անել ամեն ինչ, որպեսզի մենք ունենանք բարեփոխված Ընտրական օրենսգիրք եւ մենք տեսանք, որ պառլամենտում, իրոք, հիմնականում կա կոնսոլիդացիա եւ 95 ձայնով 2-րդ ընթերցմամբ ընդունվեց Ընտրական օրենսգիրքը, եւ 3-րդ ընթերցման է ներկայացվել եւ արտահերթի ժամանակ, ամսի 25-ին կքվեարկվի: Մենք հույս ունենք, որ այդ կոնսոլիդացիայի պայմաններում եւ նման ծանրակշիռ ձայներով կընդունվի Ընտրական օրենսգիրքը:
ՀՀԿ ԳՄ նիստում քննարկվել են նաեւ ՀՀ նախագահ Սերժ Սարգսյանի Վիեննա այցի արդյունքները: Շարմազանովի ներկայացմամբ՝ համանախագահ երկրների արտաքին գործերի նախարարները հանդես են եկել հայտարարությամբ, որը հիմնականում համահունչ է հայկական կողմի թեզիսներին, առաջարկություններին.«Մենք, ընդհանուր, առմամբ բավարարված ենք: Այնտեղ նշված է ե՛ւ 94 թվականի զինադադարի անժամկետ լինելու վերաբերյալ եւ մոնիտորինգի իրականացման վերաբերյալ, որի մասին խոսել է հայկական կողմը: Եվ 3-րդը՝ բնականաբար, խաղաղ կարգավորումն եւ ԵԱՀԿ ներկայացուցչի գրասենյակի լիազորությունների ընդլայնում»:
Սերժ Սարգսյանի եւ Հեյդար Ալիեւի հանդիպմանը հնարավո՞ր է Հայաստանի կողմից նոր պահանջներ դրվեն, այս առնչությամբ Շարմազանովն ասաց, որ Սերժ Սարգսյանն այն թեզիսները, որոնք ներկայացրել է, հիմնականում ընդունվել են համանախագահ երկրների ներկայացուցիչների կողմից. «Այս մասին գրավոր հայտարարություն է եղել: Եվ թե բնագիրը, թե թարգմանությունը կարդաք, որեւէ մեծ տարբերություն չկա: Տրամաբանությունը համահունչ է ՀՀ ղեկավարի մայիսի սկզբին արած հայտարարությանը: Հիմնականում խնդիրը գնում է վստահության մեխանիզմների ամրապնդման, խաղաղության ամրապնդման վերաբերյալ: Նոր զինադադար չի կարող լինել, 94-ի զինադադարն անժամկետ է:
Կարդացեք նաև
Ադրբեջանը պետք է իրականացնի այն պարտավորությունները, որը ստանձնել է 94-ն: Նոր փաստաթուղթ չի քննարկվել, այն, ինչ եղել է նախկինում, Կազանյան փաստաթղթի հիման վրա, դրա մասին համանախագահները խոսել են Երեւանում: Ֆրանսիայի արտգործնախարարությունը, Պետդեպը եւ պաշտոնական Մոսկվան հստակ խոսել են՝ Արցախի ժողովրդի կամարտահայտությունն է հիմնաքարային հարցերից մեկը, որեւէ նոր սկզբունք չի ներդրվել, խնդիրը պետք է լուծվի բացառապես 3 սկզբունքների վրա՝ տարածքների ամբողջականացում, ինքնորոշման իրավունքի իրացում եւ խաղաղ կարգավորում: Մեր կարծիքը չի փոխվել այս հարցում»:
Նելլի ԲԱԲԱՅԱՆ
Առա՜ջ, Քյալաստան…