«Հանուն օրենքի» շարժման համակարգող խմբի անդամներն այսօր հայտարարեցին կուսակցություն հիմնելու իրենց որոշման մասին: Առաջին համագումարի օրվա մասին էլ կհայտարարեն առաջիկա օրերին:
Նախաձեռնությունն այս պահին տասը անդամ ունի, մեծ մասը երիտասարդ գիտնականներ են: Նոր կուսակցությունն էլ կունենա «Հանուն սոցիալական արդարության» (ՀԱՍԱԿ) անունը:
«Հանուն օրենքի» շարժման համակարգող խմբի անդամ Արման Ղուկասյանն այսօր «Տեսակետ» ակումբում հայտնեց իրենց՝ քաղաքական դաշտ մտնելու նպատակները. «ՀՀ հասարակության զգալի հատվածը գտնվում է աղքատության շեմին, երկիրը ծանր սոցիալ-տնտեսական վիճակում է… ելնելով այդ հանգամանքներից ու հաշվի առնելով նաեւ չորսօրյա պատերազմի արդյունքները՝ որոշել ենք ձեւավորել նոր քաղաքական ուժ հանուն սոցիալական արդարության»:
Կուսակցությունը կունենա սոցիալ-պահպանողական գաղափարախոսություն:
Կարդացեք նաև
Ինչո՞ւ են երիտասարդ գիտնականները որոշել զբաղվել քաղաքականությամբ եւ ոչ թե գիտությամբ հարցին էլ՝ Արման Ղուկասյանը պատասխանեց. «Եկել է ժամանակը, որ բոլորս պետք է մտահոգվենք նաեւ մեր պետության ճակատագրով, գիտնականը զբաղվում է գիտությամբ, բայց քաղաքականությունը նույնպես գիտություն է, որին պետք է գիտական մոտեցում ցուցաբերել»:
Նրա խոսքով, իրենց գլխավոր նպատակն է ՝ հաստատել սոցիալական արդարության մթնոլորտ, ինչը ենթադրում է հարուստների ու աղքատների միջեւ տարբերությունը նվազեցնել. «Պետք է հրաժարվենք օտար երկրների ապրանքներից: Մենք փորձելու ենք նպաստել բոլոր հայ արտադրողներին, տեղական արտադրողներին եւ ներկայացնել նրանց արտադրանքը նաեւ արտասահմանյան շուկաներում:
Ունենք ծրագրեր, դրանք գործող ծրագրեր են, եկել ենք գործելու: Ասպիրանտներ ենք, երիտասարդ գիտնականներ: Գիտական մոտեցում ենք ցուցաբերում քաղաքական հարցերին»:
Խմբի անդամ Ծովինար Կոստանյանն էլ պատմեց, որ քաղաքական դաշտ մտնելուց առաջ հարցում են անցկացրել հանրապետության բոլոր մարզերում, մասնակցել է 5000 հոգի: Իրենց հետաքրքրել են գործող ամենախոշոր կուսակցությունների գործունեության ու գաղափարախոսության մասին, թե ինչպես են քաղաքացիները վերաբերում այդ կուսակցությունների գործունեությանն ու գաղափարախոսությանը:
Հարցվածների 36 տոկոսը անկուսակցական են եղել, մնացածը կուսակցական, ըստ Ծովինարի, հարցվածների 49 տոկոսը ՀՀ որեւէ կուսակցության չի վստահում՝ լինելով կուսակցական, 18 տոկոսը վստահում է ՀՀԿ-ին, իսկ մնացած կուսակցություններն ավելի ցածր վստահություն են ունեցել:
Արփինե ՍԻՄՈՆՅԱՆ
