Ինչպես հայտնի է, Ընտրական օրենսգրքի նախագծի շուրջ ձեւավորված «4+4+4» ձեւաչափի մասնակից քաղաքական ուժերը համատեղ հայտարարություն են ստորագրել: Նշենք, որ այդ հայտարարությունը հրաժարվել են ստորագրել քաղաքացիական հասարակության ներկայացուցիչները:
Aravot.am-ն այս մասին զրուցեց Հիմնադիր խորհրդարանի անդամ Վարուժան Ավետիսյանի հետ: Նա նկատեց, որ ընդդիմադիր ուժերը հինգ պահանջներ էին ներկայացրել, որոնք կիսատ-պռատ են ընդունվում. «Տեղի ունեցող ընդհանուր գործընթացների մեջ պետք է սա դիտարկել, խոսքը առաջին հերթին Արցախի խնդրին եւ մեր անվտանգությանն է վերաբերվում: Պայմանավորվածության ուրվագծեր եմ ես տեսնում. ընդդիմության որոշ հատվածի հետ իշխանությունը փորձում է որոշակի քվոտաներ տալով պայմանավորվել, որ նրանք այս հարցում իրենց պահեն իշխանության ուզածի պես՝ Արցախի անվտանգության ապահովման հարցում առհասարակ»:
Վարուժան Ավետիսյանը չցանկացավ անդրադառնալ հայտարարության մանրամասներին, թե ինչ փաստաթուղթ են ստորագրում, այնտեղ ինչ է գրված. «Ես համարում եմ, որ դա իշխանության եւ պալատական ընդդիմության գործարք է Հայաստանի (Արցախը ներառյալ) անվտանգության հաշվին: Եվ ընդունելի չէ դա: Այդ խնդիրը չէ, որ այսօր ազգովի ունենք լուծելու: Մենք հայրենիք ենք կորցնում, մենք պետականություն ենք կորցնում: Այդ միջկուսակցական պայմանավորվածություններով այս ռեժիմը, համակարգը հայրենիքի հաշվին պահելու գործարքները պետք է մերժել»:
Ամի ՉԻՉԱԿՅԱՆ
