2016թ. հունիսի 24-26-ին առաջին քրիստոնյա երկիր այցելած Հռոմի պապ Ֆրանցիսկոսը ամփոփել է Հայաստանում անցկացրած երեք օրերը։ Այս մասին տեղեկացնում է The Washington Post-ը։
Պապը մեկնաբանել է, թե ինչու Հայաստանում ևս կիրառեց ցեղասպանություն եզրույթը՝ ասելով, որ դա սովորական այն արտահայտությունն է, որ ինքը կիրառում էր Արգենտինայում, որտեղ շատ ջերմ հարաբերություններ է ունեցել տեղի հայկական համայնքի հետ. «Երբ մենք խոսում էինք հայերի բնաջնջման մասին, բառը, որ մենք օգտագործում էինք, ցեղասպանությունն էր։ Ես այլ եզրույթ չգիտեի»։
Ֆրանցիսկոսն ավելացրել է նաև, որ միայն Հռոմ ժամանելուց հետո է ինքն իմացել նոր արտահայտություններ, ինչպիսիք են Մեծ եղեռն, սարսափելի ողբերգություն և այլն, որոնք փորձում են բնութագրել հայերի կոտորածները։ Պապն ասել է, որ ինքը որոշեց Հայաստանում ևս օգտագործել ցեղասպանություն բառը, որովհետև. «Շատ տարօրինակ կթվար, եթե Հայաստանում ես չասեի դա»։
