«Միջանկյալ դիրքի համար պետք են փոխզիջումներ: Միայն հողային տարածքների փոխզիջում չլինի, արյան գնով ձեռք բերվածը չպետք է կորցնենք»- Aravot.am-ի հետ զրույցում ի պատասխան Ռուսաստանի կողմից ղարաբաղյան կարգավորման հարցում միջանկյալ լուծում գտնելուն՝ ասաց գրող-լարախաղաց, Արցախյան ազատամարտի մասնակից Վլադիմիր Հակոբյանը:
Նա հավելեց, որ առաջին հերթին մենք պետք է կարողանանք մեզ վստահել, մենք որոշենք՝ ինչ ենք անելու, ապա մյուսները մտնեն մեր գործունեության մեջ. «Պատերազմից հետո մենք մինչև հիմա այս քսան տարվա մեջ չկարողացանք սպառազինություն ուժեղացնել, մեծացնել: Այնքան շուտ հավատացինք մենք, որ զինադադար է և կանգնեցինք»:
Լարախաղացի խոսքով՝ մարդ եթե կառուցում է ինչ-որ բան, առաջին հերթին վտանգի մասին պետք է մտածի, ապա մնացածի. «Եթե ես լարի վրա խաղում եմ, մի քիչ էլ վտանգի մասին չմտածեմ, չապահովեմ ինձ, կընկնեմ: Հարկավոր է առաջին հերթին մտածել անվտանգության մասին: Որոշ մարդիկ ուշադիր չեն հայոց երկրի պետականությանը: Ես իրավունք ունեմ խոսելու ու պահանջելու, որ այդքան տարիների մեջ հարկավոր էր ուժեղանալ և հզորանալ, ոչ թե դատարկ պալատներ ստեղծել: Հայը շատ շուտ պայքարում է և շատ շուտ մոռանում: Երբ ինչ-որ բանի համար պայքարում ես, պետք է դրա արժեքն իմանալ և անպայման պահպանել»:
Նշենք, որ գրող-լարախաղացն ունի տպագրած 8 գիրք, որոնք միայն լարախաղացության շնորհիվ են լույս տեսել: Դրանք Արցախյան ազատամարտի, հայ անվանի գործիչների, ֆիդայիների մասին են:
Կարդացեք նաև
Արփի ԿԻՐԱԿՈՍՅԱՆ
