Էրեբունի եւ Նուբարաշեն վարչական շրջանների ընդհանուր իրավասության առաջին ատյանի դատարանում հունիսի 30-ին դատավոր Վարդան Գրիգորյանի նախագահությամբ շարունակվում էր «Օֆշորի» գործի քննությունը:
Դատարան չէին ներկայացել «Ամերիա» բանկի ներկայացուցիչները: Վարդան Գրիգորյանը հայտնեց, որ Սերգեյ Պետրոսյանը դատարանին տեղեկացրել է, որ կարող է ներկայանալ միայն մյուս դատական նիստին, իսկ մյուս վկաների մասին դատարանը տեղեկություններ չունի:
Գործով տուժող Փայլակ Հայրապետյանի ներկայացուցիչ Շալիկո Փիրուզյանն ասաց, որ Սերգեյ Պետրոսյանը պետք է ներկայանար դեռ նախորդ դատական նիստին: Նա միջնորդեց բերման ենթարկել վկա Գագիկ Սահակյանին, իսկ «Ամերիա» բանկի նախագահ Արտակ Հանեսյանին եւս մեկ անգամ պատշաճ ծանուցել: Ամբաստանյալ Աշոտ Սուքիասյանի ներկայացուցիչ Յուրիկ Խաչատրյանը չառարկեց միջնորդությանը:
Վարդան Գրիգորյանը նկատեց, որ դատարանն արդեն երրորդ անգամ է պաշտոնապես ծանուցում «Ամերիա» բանկի ղեկավարությանը. «Ես ուզում եմ ձեռնպահ մնալ բերման որոշում կայացնելուց հետեւյալ պատճառաբանությամբ՝ մեր ծանուցման մեջ տվյալ անձանց չեն բացատրվել վկաների դատարան չներկայանալու իրավական հետեւանքները: Նիստից հետո մենք ծանուցման բովանդակության մեջ կներառենք չներկայանալու իրավական հետեւանքները: Որից հետո, եթե հաջորդ դատական նիստին չեն գա, կքննարկենք»:
Կարդացեք նաև
Ամի ՉԻՉԱԿՅԱՆ
