Ադրբեջանի նախագահական նստավայրի աշխատակազմի ղեկավարի տեղակալ, ներքին կապերի բաժնի ղեկավար Նովրուզ Մամեդովը հարցազրույց է տվել Trend լրատվական գործակալությանը, որի ընթացքում խոսել է Լեռնային Ղարաբաղի հակամարտության կարգավորման գործընթացի մասին։
Ադրբեջանի բարձրաստիճան պաշտոնյայի կարծիքով՝ շատերը նպատակ ունեին տպավորություն ստեղծել, թե հակամարտությունը սառեցված է, բայց ապրիլի սկզբին տեղի ունեցածից հետո բոլորը հասկացան, որ Արցախի հակամարտությունն ամենևին էլ սառեցված փուլում չէ, ընդ որում՝ ապրիլյան դեպքերը կազմակերպելու համար Մամեդովը մեղադրել է Հայաստանի Հանրապետությանը։
Հակամարտության կարգավորման գործում, ըստ Նովրուզ Մամեդովի, մեծ է նաև Ադրբեջանի նախագահի ներդրումը, որի՝ ԵՄ, ԱՄՆ, ՌԴ, Թուրքիա, Իրան և այլ երկրներ կատարած այցերի արդյունքում ձևավորվել է ընդհանուր պատկերացում, որի համաձայն՝ արդեն ժամանակն է լուծել 25 տարի շարունակվող հակամարտությունը։
Արցախի հակամարտության կարգավորման ներկայիս փուլում Մամեդովը մեծ նշանակություն է տվել Գերմանիային, նշելով, որ այդ երկիրը, որպես ԵԱՀԿ նախագահող երկիր, փորձում է ջանքեր գործադրել հակամարտության կարգավորման ուղղությամբ։
