ՀՀ Կոտայքի մարզպետ Կ. Գուլոյանը, մարզպետարանի պաշտոնատար անձանց ուղեկցությամբ, այցելել է հուլիսի 9-11-ն ընկած ժամանակահատվածում կարկտահարությունից վնասներ կրած համայնքներ:
Մարզի ղեկավարը նախ եղել է Քասախ համայնքում, հանդիպում ունեցել համայնքի բնակիչների հետ:
Քասախ համայնքի ղեկավարը տեղեկատվություն է ներկայացրել արտակարգ իրավիճակների հետևանքով ֆիզիկական և իրավաբանական անձանց հասցված վնասները գնահատող համայնքային հանձնաժողովի գործունեության վերաբերյալ:
Այնուհետև Կոտայքի մարզպետը պատասխանել է համայնքի բնակիչների կողմից բարձրացվող հարցերին, պարզաբանումներ տրամադրել արտակարգ իրավիճակների հետևանքով առաջացած վնասները գնահատող հանձնաժողովների աշխատանքների ընթացակարգերի վերաբերյալ:
Կարդացեք նաև
Կ. Գուլոյանն այցելել է նաև մարզի Պռոշյան և Նոր Երզնկա համայնքներ, ծանոթացել կարկտահարության արդյունքում ստեղծված իրավիճակին, լսել համայնքների ղեկավարների և բնակիչների կողմից բարձրացվող հարցադրումներն ու վերջիններիս հետ համատեղ քննարկել առկա խնդիրներին լուծումներ հաղորդելու հնարավոր ուղղությունները:
Մարզի ղեկավարը աշխատանքային խորհրդակցություն է հրավիրել Եղվարդի քաղաքապետարանում, որտեղ քննարկվել են ինչպես հիշյալ համայնքին այնպես էլ մարզի գյուղատնտեսությանը հասցված վնասների վերաբերյալ ընդհանրական ցուցանիշներն ու ձեռնարկվելիք միջոցառումների հիմնական ուղղությունները:
Կոտայքի մարզպետ Կ. Գուլոյանը այցելել է նաև մարզի Աղավնաձոր և Մարմարիկ համայնքներ. այս համայնքներում ևս ծանոթացել գյուղատնտեսությանը հասցված վնասներին, ինչպես նաև զրուցել բնակիչների հետ և քննարկել համայնքների զարգացման հեռանկարային մի շարք ծրագրերն ու տարբեր ենթակառուցվածքների բարելավմանը միտված մարզային նախաձեռնությունների ընթացքը:
Այցելությունների ընթացքում Կոտայքի մարզպետը պատրաստակամություն է հայտնել հնարավորությունների և իրավասությունների սահմաններում աջակցել համայնքների ազգաբնակչությանը, ինչպես նաև մարզպետարանի համապատասխան ստորաբաժանումներին ու արտակարգ իրավիճակների հետևանքով ֆիզիկական և իրավաբանական անձանց հասցված վնասները գնահատող մարզային հանձնաժողովին հանձնարարել կատարել մանրամասն վերլուծություններ և սահմանված կարգով ապահովել անհրաժեշտ գործառույթների իրականացումը:
Կոտայքի մարզպետարան
