Միջազգային ԶԼՄ-ները շարունակում են հետևել Հայաստանի Հանրապետության մայրաքաղաք Երևանի Էրեբունի համայնքում տեղակայված ոստիկանության ՊՊԾ գնդի գրավման հետևանքով տեղի ունեցող իրադարձություններին։
Միջազգային մամուլի ուշադրության կենտրոնում այս անգամ հայտնվել են բժիշկները, որոնք մտել էին ՊՊԾ գնդի տարածք՝ վիրավորներին օգնություն ցուցաբերելու նպատակով, որից հետո գունդը գրաված անձինք արգելել են բժիշկներին դուրս գալ իրենց վերահսկած տարածքից։
Հանրահայտ Al jazeera-ի անդրադարձում համառոտ անդրադարձ է կատարվել իրադարձությունների զարգացմանն ու նշվել, որ բժիշկները շարունակում են մնալ ՊՊԾ գունդը գրավածների ենթակայության տակ։
Բրիտանական The Guardian-ի ուշադրության կենտրոնում կրկին բժիշկներն են, որ հայտնվել են ոստիկանական գնդի տարածքում և չեն կարողանում դուրս գալ այնտեղից։ Բրիտանական պարբերականի հոդվածն ավարտվում է հետևյալ նախադասությամբ. «Նախկինում ռուսամետ զինվորական սպա Սարգսյանը 2.9 միլիոն բնակչությամբ երկրի նախագահ դարձավ` հաղթելով 2008թ. ընտրությունները, որից հետո բախումներ տեղի ունեցան պարտված թեկնածուի աջակից ցուցարարների և ոստիկանների միջև, որի հետևանքով զոհվեց 10 մարդ»։
Կարդացեք նաև
Ամերիկյան The New York Times-ն իր հոդվածում անդրադառնալով Հայաստանի մայրաքաղաք Երևանում տեղի ունեցող իրադարձություններին նույնպես ուշադրության է արժանացրել ոստիկանական գնդում պահվող բժիշկների թեմային։ Ամերիկյան պարբերականը արձանագրել է նաև, որ ի թիվս այլ բերման ենթարկվածների, ՀՀ ոստիկանությունը բերման է ենթարկել նաև կանադահայ դերասանուհի Արսինե Խանջյանին։
