Էրեբունի եւ Նուբարաշեն վարչական շրջանների ընդհանուր իրավասության դատարանում «Օֆշորի» հայտնի գործով դատի ժամանակ այսօր հարցաքննվեցին կարեւոր վկաներ՝ ԱրմՍվիս բանկի գործադիր տնօրեն Գեւորգ Մաչանյանը, Ամերիաբանկի գլխավոր տնօրեն Արտակ Հանեսյանը եւ Աշոտ Սուքիասյանի «Ձորագյուղ» արտադրական կոոպերատիվի հաշվապահ Իննա Սուքիասյանը: Վերջինս Աշոտ Սուքիասյանի բարեկամն է:
ԱրմՍվիս բանկի տնօրեն Մաչանյանն ասաց, թե ինչպես են ծանոթացել գործով տուժող Փայլակ Հայրապետյանի հետ, ամբաստանյալ Աշոտ Սուքիասյանի հետ: Նա նախօրոք զգուշացեց, որ անցել է 7-8 տարի ու ամեն ինչ չէ, որ հիշում է: Նա որոշ դրվագներ պատմեց ոսկերչության ու ադամանդագործության մասին իրենց քննարկումից: Նա ասաց, որ այն ժամանակ բանկի կապիտալը փոքր է եղել, մեծ վարկեր չեն տվել, չեն ստացել:
Դատավորը հետաքրքրվեց՝ պաշտոնատար անձինք ՀՀ-ի միջնորդե՞լ են, որ վարկ տրամադրեք՝ նկատի ունենալով սրբազան Նավասարդ Կճոյանին, նախկին վարչապետ Տիգրան Սարգսյանին՝ նա ասաց, որ ոչ, նման միջնորդություններ չեն եղել:
Կարդացեք նաև
Մաչանյանին հրավիրել էր տուժող կողմը: Փայլակ Հայրապետյանի փաստաբանը հետաքրքրվեց, թե Աշոտ Սուքիասյանը քանի՞ ձուլակտոր ոսկի է գնել, ի՞նչ քաշով, ի՞նչ գործարքներ է արել եւ այլն: Մաչանյանը հիմնականում պատասխանում էր, որ շատ ժամանակ է անցել, չի հիշում: Փաստաբանը դժգոհեց՝ պետք է պատրաստված գայիք, ձեր ցուցմունքը պիտի հիշեիք: Դատավորը առարկեց՝ «Մարդ կա՝ 3 օր առաջվա եղածը չի հիշում 3.5 տարի է անցել իր ցուցմունքից»:
Ամերիաբանկի գլխավոր տնօրեն Արտակ Հանեսյանին դատավորը հարցրեց՝ բացակայո՞ւմ էիք Հայաստանից, նո՞ր եք վերադարձել, կարգավորվեցի՞ն ձեր ընտանեկան հանգամանքները: Հանեսյանը հարցերից զարմացավ՝ արձակուրդ էի գնացել: Դատավորը պատասխանեց. «Մեզ բանկից գրավոր պատասխանում էին, որ ընտանեկան հանգամանքներից ելնելով չեք կարող գալ»: Հանեսյանը արձագանքեց. «Երեւի իրենք համարել են, որ արձակուրդն ընտանեկան հանգամանք է»:
Հռիփսիմե ՋԵԲԵՋՅԱՆ
