«Ահաբեկչությունն, իհարկե, ծանր հանցանք է, եւ այն խրախուսել, իրոք, չի կարելի։ Բայց այս դեպքում մենք ահաբեկիչների հետ գործ չունենք։ «Սասնա ծռերի» գործողություններն ահաբեկչության հետ ընդհանրություններ չունեն։ Ս․ Սարգսյանի ելույթի այս հատվածը կարող է նախաքննության համար որպես ցուցում հանդիսանալ։ Իհարկե, նա պետք է ձեռնպահ մնար նման գնահատականներ հնչեցնելուց»,- Aravot.am-ի հետ զրույցում իրավապաշտպան Վարդան Հարությունյանն այսպես պատասխանեց մեր հարցին՝ նախագահ Սերժ Սարգսյանի՝ ահաբեկչություն եզրույթն օգտագործելու հետ կապված:
Հիշեցնենք, որ Սերժ Սարգսյանն իր վերջին ելույթում «Սասնա ծռեր» զինված խմբի գործողությունները մի քանի անգամ ահաբեկչություն որակեց՝ ասելով, որ «իշխանությունները կգան ու կգնան, բայց ահաբեկչության խրախուսումը քաղցկեղի պես կմնա», «ո՛չ ասեք ահաբեկչությանը», «ահաբեկչությունը մահացու մեղք է»:
Ըստ Վարդան Հարությունյանի, Սերժ Սարգսյանը ոստիկանական ուժերին դրվատանքի խոսքեր ուղղելուց առաջ պետք է անդրադառնար ստեղծված իրավիճակի պատճառներին. «Նրա ելույթը պետք է Սասնա ծռերի գոյության, Հայաստանում նման գործողություն կազմակերպելու եւ իրականացնելու պատճառների վերլուծություն պարունակեր, ապա պատճառների վերացմանն ուղղված քայլերի հերթականության մասին պետք է խոսք լիներ։ Էլ չեմ խոսում ոստիկանական բռնությունների ու կազմակերպված մարդաորսի երեւույթների մասին։ Նշածս եւ չնշածս կարեւոր թեմաները թողած՝ նա ընդամենը ասաց, որ բարդ իրավիճակ է եղել եւ իրենք հաղթանակած են դուրս եկել»:
Հռիփսիմե ՋԵԲԵՋՅԱՆ
Կարդացեք նաև
