«Էլեկտրոնային կառավարման ենթակառուցվածքների ներդրման գրասենյակ»-ի ներկայացուցիչ Հովհաննես Մինասյանը Խոսքի ազատության պաշտպանության կոմիտեի կազմակերպած «Բուժհաստատություններում քաղաքացիական անձնական տվյալների գաղտնիության ապահովումը եւ էլեկտրոնային առողջապահության համակարգի ներդրման խնդիրները» թեմայով կլոր սեղանի ընթացքում ներկայացրեց միասնական էլեկտրոնային առողջապահական համակարգի ստեղծմանն ուղղված աշխատանքը:
«Իրենից ներկայացնում է ժամանակակից էլեկտրոնային համակարգ, ինչպիսիք ներդրված են աշխարհի շատ առաջավոր երկրներում, եւ իրենից ներկայացնում է առողջապահության ոլորտում բիզնեսգործընթացների կառավարման համակարգ, որը ամբողջությամբ պետք է փոխարինի ներկայումս կիրառվող թղթային համակարգին: Այն նպատակ ունի թե՛ պետության եւ թե՛ բուժծառայություններ մատուցողների կողմից հնարավորություն տալ, որ ամբողջ համակարգի համապարփակ կառավարումն իրականացվի էլեկտրոնային համակարգի միջոցով, ինչի արդյունքում մենք կստանանք ավելի արդյունավետ առողջապահական համակարգ»,- ասաց նա:
Հովհաննես Մինասյանը նշեց, որ համակարգ կարող են մուտք գործել միայն նույնականացման քարտերով, ինչը հուսալի է եւ հնարավոր կլինի հասկանալ, թե ով է մուտք գործել համակարգ. «Անձնական տվյալների կառավարումը նախեւառաջ լինելու է պացիենտի գործը, այսինք՝ ով ինչ է տեսնելու պացիենտի մասին, որոշելու է միայն պացիենտը»:
Ամի ՉԻՉԱԿՅԱՆ
