2016թ. օգոստոսի 8-ի երեկոյան Իջեւան քաղաքին հարակից Գանձաքար գյուղի Տլուտ սարամասից անհետացել է Գանձաքարի բնակչուհի, 1938թ. ծնված Սեդա Զաքարյանը; Նա գյուղից 20 կմ հեռավորությամբ գտնվող սարամասում պահում էր իրենց ընտանիքի անասունները: Սեդա Զաքարյանը առողջության եւ հիշողության հետ կապված խնդիրներ չի ունեցել: Գանձաքարից ստացված տվյալներով՝ նա անհետացել է, երբ փնտրում էր իրենց կորած հորթերը: Նրա անհետանալուց մի քանի օր հետո գտնվել է ծեր կնոջ քաղած ուրցը՝ քարի տակ պահած:
Գանձաքարի բնակիչները Ս. Զաքարյանի անհետանալու վարկած ներկայացրին; Այդ սարամասում հովիվներ կան,ովքեր գամփռ, ագրեսիվ շներ են պահում: Հավանական է, որ ծեր կինը ենթարկված լինի այդ արձակ, մեծ շների հարձակմանը, դրանց տերերն էլ վախենալով, որ իրենց կարող են դրա համար պատասխանատվության կանչել, թաղել են հետքերը: Գանձաքարցիների վկայությամբ՝ դրանով կարելի է բացատրել, որ չնայած ամիսներ տեւած որոնումներին, կնոջ նույնիսկ ռեզինե ոտնամանները չեն գտնվել:
ՀՀ քննչական կոմիտեի Տավուշի մարզային քննչական վարչությունում Ս. Զաքարյանի անհետացման կապակցությամբ քրեական գործ է հարուցվել ՀՀ քրեական օրենսգրքի 104 հոդվածի 1-ին մասով («Սպանությունը»):
Ոսկան ՍԱՐԳՍՅԱՆ
