«Չեմ կարծում, դրա համար նրան կհեռացնեն»,-«Հայելի» մամուլի ակումբում այսօր մեկնաբանելով Aravot.am-ի հարցը, թե «ի՞նչ եք կարծում՝ Կարո Փայլանին կհեռացնե՞ն Թուրքիայի խորհրդարանից», ասաց թուրքագետ Հակոբ Չաքրյանը:
Հիշեցնենք, որ Թուրքիայի «Ազգայնական շարժում» խմբակցության անդամները հայազգի պատգամավորի ելույթից եւ խորհրդարանում Հայոց ցեղասպանության մասին հիշատակումից հետո Փայլանին խորհրդարանից հեռացնելու պահանջով են հանդես եկել:
Փայլանին արդեն իսկ զրկել են առաջիկա երեք նիստերին մասնակցելու հնարավորությունից:
«Եթե նրան ձերբակալելու խնդիր լիներ, արդեն իսկ ձերբակալված տասներեք պատգամավորների հետ կձերբակալեին: Հիմնականում կալանավորվել են նրանք, որոնք քրդաբնակ վայրերում մեծ հեղինակություն ունեն, իսկ Փայլանը քուրդ չէ եւ այնքան էլ ազդեցություն չունի բնակչությանն ուղղորդելու համար»,-ասաց Հակոբ Չաքրյանը:
Կարդացեք նաև
Հետաքրքրվեցինք նաեւ, թե Թուրքիայում քննարկման փուլում գտնվող սահմանադրական փոփոխությունների նախագիծը վտանգներ ներկայացնո՞ւմ է փոքրամասնությունների, այդ թվում՝ հայերի համար: Թուրքագետն ընդգծեց, որ նախագիծն առհասարակ վտանգավոր է Թուրքիայի համար, քանի որ միանձնյա իշխող Էրդողանն իր վերահսկողությունը ձգտում է օրինականացնել սահմանադրական փոփոխությունների միջոցով:
Փորձագետը վստահություն հայտնեց, որ Թուրքիայի խորհրդարանը կընդունի սահմանադրական փոփոխությունների նախագիծը:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
