Փարիզում վնասազերծվել է տղամարդ, որը Լուվրի թանգարանի մոտ հարձակում է գործել հսկողություն իրականացնող զինվորներից մեկի վրա և փորձել ներխուժել թանգարան, հաղորդում է Reuters-ը:
Որոշ տեղեկությունների համաձայն՝ անհայտ անձը ճանապարհային ճամպրուկով փորձել է մտնել թանգարանի հիմնական շենքի տակ գտնվող խանութ: Նա հանել է դանակը և «Ալլահ աքբար» բացականչություններով հարձակվել հսկողություն իրականացնող զինծառայողի վրա, սակայն ինքը ծանր վիրավորվել է մեկ այլ զինծառայողի գնդակից:
Տարածքից մարդիկ տարհանվել են, թանգարանը ժամանակավորապես փակ է, ոստիկանությունը շղթայել է տարածքը:
Ֆրանսիայի ներքին գործերի նախարարը իրավիճակը որակել է «լուրջ»: Փարիզի ոստիկանության պետ Միշել Կադոյի խոսքով՝ հարձակվողի առանձին արտահայտություններից կարելի է ենթադրել, որ նա պատրաստվում էր ահաբեկչություն իրականացնել:
Կարդացեք նաև
«Հարձակման վայրում ձերբակալվել է ևս մեկ մարդ, որն իրեն կասկածելի էր պահում, բայց առայժմ չի հաջողվել հաստատել նրանց միջև կապը»,- ասել է նա: Ոստիկանապետի խոսքով՝ հարձակվողի ճամպրուկում պայթուցիկ սարքեր չեն հայտնաբերվել: Հարձակման ենթարկված զինվորը թեթև վնասվածք է ստացել:
Պատրաստեց՝ Վիկտորյա ԱՆԴՐԵԱՍՅԱՆԸ
