«Հասկանում եմ՝ քաղաքացին ասում է՝ թոշակառու մարդ եմ… Մենք պայքարում ենք նաեւ թոշակառուների եւ նրանց սերունդների համար: Չենք կարող թույլատրել, որ հինգ տարին մեկ մեր ձայնը գնվի: Դա հարված է մեր արժանապատվությանը»,-Արմավիրում այսօր «ԵԼՔ» դաշինքի նախընտրական բակային հանդիպման ժամանակ խոսելով ընտրակաշառքը մերժելու կարեւորության մասին, ասաց դաշինքի պատգամավորի թեկնածու Էդմոն Մարուքյանը:
«Երբ դասախոսը կաշառք է վերցնում, չի մտածում, որ դրանով վտանգում է սահմանին կանգնած զինվորին: Յուրաքանչյուր կաշառք տվող եւ վերցնող վտանգում է ՀՀ ինքնիշխանությունը, սահմանը, ազգային անվտանգությունը»,-համոզմունք հայտնեց Էդմոն Մարուքյանը:
Նրա խոսքով՝ «ԵԼՔ»-ը ներկայացրել է երեսուն քայլից բաղկացած նախընտրական ծրագիր, որը կնպաստի ՀՀ զարգացմանը. «Վաղը մյուս օրը չի կարող լինել մեկը, ով չի իմացել «ԵԼՔ»-ի ծրագրի մասին: Ձեր ամեն մի ձայնը հասնելու է մեզ, նոր տեխնոլոգիաները պաշտպանելու են Ձեր ձայնը»:
Լուիզա ՍՈՒՔԻԱՍՅԱՆ
Կարդացեք նաև
Լուսանկարը՝ «ԵԼՔ» դաշինքի
