Տրանսպորտի, կապի եւ տեղեկատվական տեխնոլոգիաների փոխնախարար Արթուր Առաքելյանն այսօր կառավարության նիստից հետո, լրագրողների հետ զրույցում արդարացրեց Հյուսիս-Հարավի՝ վարչապետի ասած՝ «Մոստերի վրա պերեկուր» անող շինարարներին եւ շինարարության դանդաղ ընթացքը:
Հիշեցնենք, որ այսօր Կարեն Կարապետյանը դժգոհություն է հայտնել ճանապարհաշինական աշխատանքներից, նշելով՝ «9 անց կես «մոստերի» վրա աշխատող չկա: 5 անց կես սաղ «պերեկուր» են անում: Ես մի անգամ էդ հարցը տվել եմ, ասել են՝ ժամկետի մեջ ա: Եթե ըսենց են աշխատում, ժամկետը կարճացրեք: Որեւիցե աշխատանք չի կատարվում: Նախեւառաջ էդ կամուրջների վրա բազմաթիվ ինժեներական աշխատանքներ կան, որոնք կարող են կամուրջից դուրս անել: Շատ կոշտ՝ մարզպետներին, բոլորին իրենց տարածքներում, կոշտ, չափազանց կոշտ: Քանի անգամ ա գնում եմ, հատուկ նայում եմ, 9 անց կես աշխատող մարդ չկա: Ես հասկանում եմ, որ դա մեր կապալառուի խնդիրն ա, բայց պայմանագիրն ընենց արեք, որ մենք կարողանանք հետեւենք»:
Փոխնախարար Արթուր Առաքելյանն այս առնչությամբ լրագրողների հետ ճեպազրույցում ասաց, որ կամուրջների եւ ուղեանցումների շինարարական աշխատանքների վերաբերյալ շատ են դժգոհությունները. «Օրինակ` շատ են ասում, որ ձմեռը այդ կամուրջների հատվածում աշխատանքներ չեն տարվում, ուղղակի փակ է, միակողմանի է, ինչը անհանգստություն եւ անհարմարություն է պատճառում, վթարների արդյունք է դառնում: Մենք ստիպված ենք փակ պահում ճանապարհը, զուտ անվտանգության նորմերից ելնելով»:
Կարդացեք նաև
Ինչ վերաբերում է շինաշխատանքների կապալառուի հետ կնքած պայմանագրում հնարավոր փոփոխությանը, ինչպես վարչապետն էր ասել, որպեսզի աշխատանքները շուտ ավարտվեն, փոխնախարարն ասաց. «Մեր համար կարեւոր է վերջնաժամկետն ըստ պայմանագրի: Ստանդարտ պայմանագիր է կապալառուների հետ կնքվում, երբ նախագծային փուլում ծրագրվում է շինարարության տեւողությունը, հաշվարկման ընթացքում հաշվի են առնվում քաղաքաշինական նորմերը, եւ ըստ այդ նորմերի տեւողության, 2 տարուց ավելի պիտի լիներ: Սակայն մենք բանակցել ենք այդ ընկերությունների հետ, եւ մոտ կես տարի ավելի շուտ կավարտեն»:
Ըստ Առաքելյանի, ներկայում Հյուսիս-Հարավ արագընթաց մայրուղու ընդհանուր
ճանապարհից ընդամենը 35 կիլոմետր ճանապարհ է կառուցվել եւ շահագործման հանձնվել, այս ընթացքում ծախսվել է մոտ 70 միլիոն դրամ։
Մայրուղու շինաշխատանքների ավարտն, ըստ փոխնախարարի, պարզ չէ, այն կախված է ֆինանսական միջոցներից:
Մանրամասն՝ տեսանյութում
Նելլի ԲԱԲԱՅԱՆ
