ԴԱԻՇ ահաբեկչական խմբավորումը ստանձնել Է մարտի 22-ին Լոնդոնում կատարված ահաբեկչական գործողության պատասխանատվությունը: Այս մասին հաղորդում է The Guardian պարբերականը:
Խմբավորման քարոզչությունն իրականացնող Amaq գործակալությունը հայտնել է, որ հարձակման համար պատասխանատու է խմբավորումը: Գործակալության հաղորդագրությունում հարձակումն իրականացնողին անվանել են «ԴԱԻՇ-ի մարտիկ»:
Մեծ Բրիտանիայի վարչապետ Թերեզա Մեյը հաստատել է, որ հանցագործը նախկինում կասկածվել է ահաբեկչության մեջ, նրա գործով քննություն է իրականացրել հակահետախուզական ծառայությունը՝ MI5-ը: Նրա խոսքով՝ ենթադրյալ ահաբեկիչը, ամենայն հավանականությամբ, միայնակ է գործել:
Հիշեցնենք, որ Լոնդոնում՝ խորհրդարանի շենքի մոտ, մարտի 22-ին տեղի ունեցած ահաբեկչության հետևանքով զոհվել է 4 մարդ, այդ թվում՝ հարձակում գործած անձը, վիրավորվել՝ 40-ը:
