Արարատի մարզի Արարատ քաղաքում քարոզարշավի ժամանակ «Ելք» դաշինքի առաջնորդ Էդմոն Մարուքյանն ասաց, որ այս դաշինքը ատելություն չի քարոզում, միայն դրական հույզեր է առաջացնում եւ շարժումը տանում դեպի փոփոխություններ:
«Վերջին 3 օրերի հետ կապված այն տեղեկություններին անդրադառնամ, որ իբր թե մենք փնովում, քննադատում ենք բացի իշխանություններից, նաեւ մյուսներին: Նման բան չկա, մենք շատ դրական ենք տրամադրված բոլորի նկատմամբ, բոլորին շատ սիրում ենք: Ուղղակի մի խնդիր կա՝ մենք ճշմարտությունը չենք կարող թաքցնել մեր քաղաքացիներից, մենք ճշմարտությունն ենք ասում»:
Մարուքյանն ասաց, իրենք դրական քարոզով գնում են դեպի հաղթանակ:
Մարուքյանը դիմելով արարատցիներին ասաց. «Պատկերացրեք ապրիլի 5-ին պարզվի, որ ձեր հարեւանը «Ելք» դաշինքին չի ընտրել, ասենք ՀՀԿ-ի նախկին կամ ներկա կոալիցիոն գործընկերներին, որոնք էլի կոալիցիա են կազմել, եւ իրենց ընդդիմադիր ձայնը փոշիացել է ու գնացել է հանրապետականի օգտին, էդ սխալը էլ չեք կարողանալու ուղղել: Չեք կարողանալու ասել՝ դե լավ, նախագահական ընտրություններին սխալս կուղղեմ: Չեք կարող, չկան նախագահական ընտրություններ: Դրա համար պետք է ուղղակի սխալ թույլ չտալ: «Ելք» դաշինքը միավորված ընդդիմություն է, Հայաստանի հանրապետության քաղաքացիների պահանջով ձեւավորված ընդդիմություն է եւ միակ ուժն է, որը երբեք ՀՀԿ-ի հետ կոալիցիա չի եղել, կամ ընդդիմություն, որը հիասթափեցրել է»:
Կարդացեք նաև
Մարուքյանը դաշինքի ծրագրային դրույթներից ներկայացրեց, ասաց, որ ստեղծելու են ճշմարտության հանձնաժողով, որը իրավական հիմք է ունենալու եւ բացահայտելու է ճշմարտությունը. «Թե քաղաքական հայտնի սպանությունները՝ հոկտեմբերի 27-ը, մարտի 1-ը, թե «Սասնա ծռերի» ՊՊԾ գնդի գրավման գործը: Ճշմարտության հանձնաժողովի նպատակ ստեղծելը այն է, որ մեր հանրությունը համերաշխություն ստանա: Ճշմարտության կարիք կա, այնքան են ատելություն քարոզվել տաբեր կողմերից, որ մարդիկ չեն կարողանում միասնական տարբեր նախաձեռնություններում հանդես գալ: Մենք այդ ատելությանը դեմ ենք, մենք գալիս են ճշմարտությունը բացահայտելու եւ այդ բաց էջերը փակելու, եւ շարժվելու ենք առաջ, դեպի ավելի զարգացող, ավելի հզոր Հայաստանի Հանրապետություն»:
Նելլի ԲԱԲԱՅԱՆ
