Կաշառք վերցնելու մեջ մեղադրվող Շենգավիթ վարչական շրջանի ընդհանուր իրավասության դատարանի նախկին դատավոր Իշխան Բարսեղյանը պնդում է, որ իր գործով դատախազ Կարեն Բիշարյանը պատշաճ դատախազ չէ: Նա այսօր դատարանից պահանջեց հեռացնել նրան վարույթից:
Իշխան Բարսեղյանը հայտարարեց, որ եթե նախաքննության ընթացքում գործը վերահսկել է գլխավոր դատախազ Արթուր Դավթյանը, դատաքննության ընթացքում նա պետք է պաշտպանի այդ մեղադրանքը:
«Եղբայր, օրենքով դատեք… գլխավոր դատախազին չի կարող փոխարինել նույնիսկ նրա առաջին տեղակալը»,- ասաց Իշխան Բարսեղյանը՝ նշելով, որ բացի նախաքննությունը վերահսկած գլխավոր դատախազից՝ մեղադրանքը մեկ էլ կարող է պաշտպանել նրա վերադասը, բայց հայտնի է, որ նա վերադաս չունի:
Իշխան Բարսեղյանի պաշտպանները եւս միացան այդ միջնորդությանը՝ պահանջելով գլխավոր դատախազի՝ ներկայությունը դատական նիստերին: Դատարանը միջնորդության վերաբերյալ հայտարարեց, որ Կարեն Բիշարյանը պատշաճ դատախազ է, նրան վարույթից հեռացնելու օրենքով սահմանված որեւէ հիմք էլ չկա:
Կարդացեք նաև
Դատախազ Կարեն Բիշարյանն էլ իրավական ակտի կամայական մեկնաբանություն որակեց նախկին դատավորի հայտարարությունն ու միջնորդությունը՝ ասաց այն նույնիսկ քննարկման ենթակա չէ:
Հիշեցնենք, որ Իշխան Բարսեղյանը մեղադրվում է ՀՀ քրեական օրենսգրքի 311-րդ հոդվածի 4-րդ մասի 3-րդ կետով (կաշառք ստանալ): Հիշեցնենք նաեւ, որ այս գործով կաշառքի միջնորդություն կատարելու համար մեղադրվում է փաստաբան Էլզա Զաքարյանը՝ ՀՀ քրեական օրենսգրքի 313-րդ հոդվածի 1-ին մասով:
Արփինե ՍԻՄՈՆՅԱՆ
