Մայիսի 10-ին Գյումրիում` Գեղագիտության ազգային կենտրոնում, իսկ մայիսի 11-ին` Նորարար փորձառական արվեստի կենտրոնում կայանալիք համերգներին միասին հանդես կգան դուդուկահար Սուրեն Ասատրյանը և թուրք, երգիչ, երգահան, երաժիշտ-կատարող Նիդա Աթեշը: Նրանք կներկայացնեն տարածաշրջանի երաժշտական ժառանգությունը։
Սուրեն Ասատրյանը ծնունդով Հայաստանից է, սակայն վերջին տարիներին գործունեություն է ծավալել Թուրքիայում` հեղինակելով մեկ տասնյակի չափ ալբոմներ: Ինչ վերաբերում է Նիդա Աթեշին, նա ծնվել է Ստամբուլում, մշտապես հանդես է գալիս թուրքական ժողովրդական երգերով, մասնակցել է բազմաթիվ փառատոների:
Համերգների նախաձեռնությունը պատկանում է Ստամբուլում գործող «Անադոլու Քյուլթուր» մշակութային կազմակերպությանը: 2004 թ.-ից ի վեր «Անադոլու Քյուլթուրը» Հայաստանի տարբեր հասարակական ու մշակութային կազմակերպությունների հետ համատեղ իրականացնում է երկու ժողովուրդների միջև հարաբերությունների բարելավմանն ուղղված նախաձեռնություններ՝ ֆիլմի, երաժշտության, ժամանակակից արվեստի եւ այլ ոլորտներում:
Գոհար ՀԱԿՈԲՅԱՆ
Կարդացեք նաև
