Ազատ ոճի ըմբշամարտի Եվրոպայի առաջնության բրոնզե մեդալակիրներ, 61 կգ քաշային Վալոդյա Ֆրանգուլյանը եւ 74 կգ քաշային Գրիգոր Գրիգորյանը հավաքականի գլխավոր մարզիչ Արմեն Մկրտչյանի հետ այսօր հանդիպեցին լրագրողների հետ: Ըմբիշները գնահատեցին իրենց մրցելույթները Նովի Սադում:
Վալոդյա Ֆրանգուլյանը գոհունակություն հայտնեց, որ կարողացավ Եվրոպայի մեծահասակների առաջնությունում մեդալ նվաճել: Սակայն նա դա իր հնարավորությունների սահման չի համարում:
«Ես գիտեմ մրցակիցներիս: Իմ քաշային կարգում չկա այնպիսի ըմբիշ, որին չկարողանամ հաղթել: Սերբիայում կիսաեզրափակչի գոտեմարտում տակտիկական սխալ թույլ տվեցի ու կրկին պարտվեցի ռուսաստանցուն: Առաջիկա հավաքներում կշտկենք նաեւ այդ բացը եւ աշխարհի առաջնությունը դրա արդյունքը ցույց կտա», – ասաց Ֆրանգուլյանը:
Գրիգոր Գրիգորյանը նույնպես գոհ է բրոնզե մեդալից, սակայն հավաստիացրեց, որ ամեն բան անելու է բրոնզը ոսկի դարձնելու համար: «Երկու շատ ծանր գոտեմարտ ունեցա վրացի եւ թուրք ըմբիշների հետ: Առաջին դեպքում հաղթեցի, իսկ երկրորդում չստացվեց: Երեւի Թուրքիայի ներկայացուցիչը ավելի լավ էր նախապատրաստվել: Բայց ես բրոնզով չեմ բավարարվելու» – վստահեցրեց ըմբիշը:
Աշոտ ՀԱԿՈԲՅԱՆ
