«Ելքի» պատգամավոր Գեւորգ Գորգիսյանը ԱԺ կրթության, գիտության, մշակույթի, սպորտի եւ երիտասարդության հարցերի հանձնաժողովի նախագահի պաշտոնում առաջադրված թեկնածու Վարդան Բոստանջյանին հարցրեց՝ պատրաստվո՞ւմ է հանձնաժողովի քննարկման առարկա դարձնել վերջին ընտրություններում հրապարակված տնօրենների ցուցակները, պատժի ենթարկելու նման տնօրեններին, ինչպե՞ս է վերաբերվում կրթօջախների տնօրենների կուսակցականացմանը:
Նա պատասխանեց, որ այդ հարցը պետք է դնել, բայց չի կարծում, որ պատժամիջոցների ինստիտուտ պետք է կիրառեն՝ տնօրենների նկատմամբ: Ըստ նրա, կտրուկ չպետք է լինել: Ինչ վերաբերում է կրթօջախների տնօրենների կուսակցականացված լինելուն՝ Վարդան Բոստանջյանը պատասխանեց.
«Այո, ստացվել է էդպես, սա է մեր քաղաքացին: Ոչ թե որեւէ մեկն ասում է՝ դու արի կուսակցական դարձիր, պարզապես իրենք դառնում են կուսակցական, ի՞նչ կարող ենք անել: Մարդու իրավունքների դիտակետից ելնելով՝ իրավունք չունենք մարդուն պարտադրենք, ասենք՝ մի դարձիր կուսակցական: Բոլոր դեպքերում մենք հետ կշպրտենք»:
Բոստանջյանն ասաց, որ մարդը, իր տեղը չկորցնելու համար ստիպված դառնում է կուսակցական:
Հռիփսիմե ՋԵԲԵՋՅԱՆ
