«Եթե շատ են ներկրողները, գները պետք է իջնեն: Ինքնարժեքը կապված է տրանսպորտային բեռնափոխադրումների հետ, եթե տրանսպորտային բեռնափոխադրումներում էական փոփոխություններ չեն եղել, եթե այն շուկայից, որ գնում, բերում են, այդ շուկայում էլ գներ չեն փոխվել, ինչի պետք է բարձր գին լինի»,- Aravot.am-ին ասաց Հանրային խորհրդի տնտեսաֆինանսական հանձնաժողովի նախագահ Վազգեն Սաֆարյանը՝ անդրադառնալով ՏՄՊՊՀ նախագահ Արտակ Շաբոյանի պնդումներին, թե բանանի ու շաքարավազի շուկաներում արդեն շատ ներկրողներ կան, գները չեն իջնում՝ կապված ապրանքի ինքնարժեքի ու շահութաբերության հետ:
Մեր հարցին՝ պարոն Շաբոյանի ասածները անտրամաբանակա՞ն են, թե՞ ստում է, պարոն Սաֆարյանը կրկնեց. «Չէ, պարզապես, եթե բեռնափոխադրումների մեջ փոփոխություն չի եղել, թե հարկային օրենսդրությունը չի փոխվել ու հարկերը չեն բարձրացվել, ինչու պետք է այդպես լինի, եթե բանանի ու շաքարավազի ներկրողները շատացել են ու մենաշնորհ չէ, առավել եւս գները պետք է իջնեն, եթե բանանի ու շաքարավազի շուկայում մրցակցություն կա, չի կարող բարձր գին կամ գնաճ լինել, պետք է իջեցման բերի»:
Ինչ վերաբերում է ծխախոտի գնաճին՝ պարոն Սաֆարյանն ասաց՝ հնարավոր է հումքի արժեքն է թանկացել կամ բեռնափոխադրումներում գնային փոփոխություն կա. «Պետք է ուսումնասիրել»:
Արփինե ՍԻՄՈՆՅԱՆ
