Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով նիստն է, որն ընթանում է առանց ամբաստանյալների, դահլիճում միայն մեղադրող դատախազներն են եւ ամբաստանյալների պաշտպանները:
Հիշեցնենք, որ նախորդ նիստերում մեղադրյալները որոշակի ժամանակահատվածով հեռացվել են նիստերից, քանի որ դատարանի հանդեպ անհարգալից վերաբերմունք են դրսեւորել:
Այսօրվա նիստն էլ առանց լեզվակռվի չսկսվեց: Դատավորն արձանագրեց, որ հինգից ավելի պաշտպաններ ներկա չեն: Ոմանք արձակուրդում են, որոշներն այլ նիստի են մասնակցում եւ այդ մասին դիմում են հղել դատարանին: Դատավոր Արտուշ Գաբրիելյանը գտավ, որ պաշտպանների մի մասի բացակայությունը խոչընդոտ եւ արգելք չէ, քանի որ դատավարության նախապատրաստական՝ պաշտպանների ներգրավման փուլում են: Ներկա փաստաբանները, սակայն, դժգոհեցին:
Ինեսա Պետրոսյանն ասաց.
-Այսինքն, ես հիմա կարող եմ վեր կենալ-գնալ, քանի որ իմ բացակայությունը խոչընդոտ չի լինի: Եկել՝ ժամանակ ենք վատնո՞ւմ:
-Դուք իրավունք չունեք դահլիճը լքել առանց իմ թույլտվության,-արձագանքեց դատավորը:
-Ասենք՝ շփոթվել-եկել եմ, գնամ, սանկցիա եք կիրառելո՞ւ:
-Այո,-ժպտալով պատասխանեց Արտուշ Գաբրիելյանը:
Մյուս պաշտպանները միացան Ինեսա Պետրոսյանի առարկությանը, դատավորը կրկին չհամաձայնեց. «Երեք ամիս է՝ պարտաճանաչ կերպով նիստը ձգձգում եք: Ձեր ասածն այն է, որ եթե մեկ հոգի բացակա լինի՝ նիստը հետաձգենք…չի կարելի այդպես»:
Ինեսա Պետրոսյանը, ձայնը բարձրացնելով, դատավորին մեղադրեց բոլորի համար նյարդային մթնոլորտ ստեղծելու մեջ, Արտուշ Գաբրիելյանն էլ նրա հանդեպ սանկցիա կիրառեց՝ նախազգուշացման տեսքով, ապա ասաց, որ պաշտպաններին արգելում է առանց իր թույլտվության տեղից «ռեպլիկներ անել»:
Նիստն ընդմիջվեց:
Լուիզա ՍՈՒՔԻԱՍՅԱՆ
