Ադրբեջանի նախագահի մամուլի ծառայությունը արձագանքել է արևմտյան մամուլում տարածված Ադրբեջանի իշխանությունների կողմից փողերի լվացման հետաքննությանը:
Մասնավորապես, ինչպես հաղորդում է ԱՊԱ-ն նախագահի գրասենյակի տարածած մամուլի հաղորդագրության մեջ նշվում է, որ ո՛չ Ադրբեջանի նախագահը, ո՛չ նրա ընտանիքի անդամները որևէ առնչություն չունեն այդ հոդվածներում հնչեցրած մեղադրանքների հետ: Այդ հարցին նախագահի և նրա ընտանիքի անդամների անունները կապելու փորձերը միանգամայն անհիմն են, կանխակալ և կրում են սադրիչ բնույթ:
«Մեզ հայտնի է, որ դրա ետևում կանգնած է Ադրբեջանի և նրա ղեկավարության դեմ հանդես եկող Ջորջ Սորոսը և նրա համախոհները, որոնք միջազգային հանրության մեջ արժանիորեն խաբեբաների, խարդախների և կեղծարարների համբավ են վայելում: Այսօր Ջորջ Սորոսի կեղտոտ գործերը պետք է լուրջ քննության ենթարկվեն: Նրա հետ համագործակցող հայկական լոբբին կեղտոտ արշավ է վարում Ադրբեջանի նախագահի և նրա ընտանիքի անդամների դեմ: Սակայն, չնայած այդ փորձերին, դրանք ոչ մի արդյունք չեն տալիս: Միայն այն փաստը, որ Guardian-ում տպագրված հոդվածի հեղինակներից մեկը ազգությամբ հայ Դինա Նահապետյանն է, ևս մեկ անգամ ապացուցում է, որ այդ ստոր մեղադրանքները նույնպես այն հերթական կեղտոտ գործողություններից են, որին դիմում է համաշխարհային հայությունը»,- ասվում է հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
