Ինչպես ավելի վաղ հայտնել էինք, 2016թ. Ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 14-ի գործով հերթական դատական նիստում այսօր 13 փաստաբաններ կրկին գործադուլ արեցին՝ բողոքելով դատարանի կարգադրիչների կողմից իրենց հանդեպ, իրենց իսկ բնորոշմամբ, ապօրինի խուզարկությունների դեմ:
Նրանք այդ մասին գրություն էին թողել դատավոր Արտուշ Գաբրիելյանին, որում նաեւ խնդրանք կա՝ քանի որ Արայիկ Պապիկյանին եւ Մուշեղ Շուշանյանին թույլ չտվեցին նիստերի դահլիճ մտնել, օրենքով սահմանված կարգով հետաձգեք նիստը: Դատավորին այս խնդրանքը բարկացրեց: Նա զարմացավ՝ այդ ինչպե՞ս է ստացվում, որ չորս հանրային պաշտպաններն ամեն անգամ անարգել մուտք են գործում դատարան, իսկ մյուս փաստաբանները «խուզարկվում» են:
Ներկա հանրային պաշտպաններից Արմինե Ֆանյանը չհամաձայնեց, ասելով՝ մի դեպքում մետաղորսիչ սարքը ազդանշան է տալիս, եւ կարգադրիչը պահանջում է ցույց տալ մետաղական իրերը, մի դեպքում էլ՝ չի պահանջում, ուստի տարբերակված մոտեցում կա:
Դատավորը վրդովվեց. «Էլի եմ ասում՝ նախագահող դատավորին իր լիազորություններն իրականացնում է դատական նիստերի դահլիճում: Կարգադրիչներն էլ առաջնորդվում են օրենքով»:
Մինչ Արտուշ Գաբրիելյանն իր դիտողություններն էր անում, գործադուլ անող փաստաբաններից եւս մեկ գրություն ստացվեց. «Նորից հիշեցնենք, որ որպես նախագահող դատավոր՝ դուք պարտավոր եք ապահովել բոլոր պաշտպանների մուտքը նիստերի դահլիճ: Պահանջում ենք արհեստական խոչընդոտները վերացնել»: Արտուշ Գաբրիելյանը կրկին զարմացավ. «Այս մարդիկ (նկատի ունի ամբաստանյալներին.խմբ), էս շոգին ամեն անգամ գալիս-գնում են, նրանք ձեր պաշտպանության կարիքն ունեն, փոխանակ պաշտպանեք, եկել-ի՞նչ եք ասում…»:
Ապա հաշվի առնելով այն փաստը, որ տասից ավելի պաշտպաններ ներկա չեն, նիստը հետաձգեց եւ նշանակեց հաջորդ չորեքշաբթի՝ ժամը 11 00-ին:
Լուիզա ՍՈՒՔԻԱՍՅԱՆ
