Շիրակի պետական համալսարանի դասախոսներ Հովհաննես Խորիկյանն ու Գագիկ Համբարյանը բաց նամակ էին հղել երկրի նախագահին ու վարչապետին՝ ահազանգելով, որ «Ռեկտորն ավերում է բուհը» ու պահանջելով ֆինանսական և այլ ստուգումներ կազմակերպել համալսարանում։
Aravot.am-ի «Ռեկտորն ավերում է բուհը»՝ բաց նամակ ՀՀ նախագահին ու վարչապետին» վերտառությամբ նյութին արձագանքել է Շիրակի մարզի դատախազ Կարեն Գաբրիելյանը։
Նա Aravot.am-ին տեղեկացրեց, որ «Դատախազության մասին» ՀՀ օրենքի համաձայն համապատասխան դատախազին հանձնարարել է ուսումնասիրություններ կատարել՝ հրապարակման մեջ եղած փաստերի իսկությունը պարզելու ուղղությամբ։ «Ուսումնասիրման արդյունքներից ելնելով՝ կգնանք անհրաժեշտ եզրահանգման», -փոխանցեց դատախազը։
Նշենք, որ այսօր ևս լարված իրավիճակ էր բուհում, դասադուլի էին դուրս եկել ուսանողները։ Նրանք պահանջում էին վերանայել ուսումնական պլանները, կիրառել վարձավճարի զեղչեր (ուսանողների բողոքելով` նույնիսկ բարձր առաջադիմություն ցուցաբերող ուսանողների համար վարձավճարներն այլևս չեն զեղչվում) ու փոխել գիտխորհրդի երեկվա որոշումը, որով նամակագիրներից մեկի՝ համալսարանի պատմության եւ փիլիսոփայության ամբիոնի վարիչի ժամանակավոր պաշտոնակատար Հովհաննես Խորիկյանի նկատմամբ գիտխորհուրդն անվստահություն էր հայտնել:
