Ըստ մեր աղբյուրների, ՔԿՀ վարչության պետի հրահանգով այսօր առավոտից խուզարկություններ են իրականացվել բոլոր ՔԿՀ-ների աշխատակիցների աշխատասենյակներում: Դա կապված է «Վանաձոր» ՔԿՀ-ում բացահայտված կաշառքի դեպքերի հետ:
«Վանաձոր» ՔԿՀ-ում խստացված ռեժիմ է. խուզարկություն է իրականացվել բոլոր խցերում:
Ըստ մեր աղբյուրների՝ այդ ՔԿՀ-ում վաղուց բարձիթողի իրավիճակ է: Որոշ դատապարտյալներ իրենց արտոնյալ էին զգում, ու մասնավորապես՝ նրանց խցերի դռները չէին փակվում, քանի որ նրանք «բարիդրացիական հարաբերություններ» ունեին վարչակազմի հետ:
Հիշեցնենք, որ ըստ դատախազության հաղորդագրության՝ «Վանաձոր» քրեակատարողական հիմնարկի պետը, օպերատիվ բաժնի պետը և այլ ծառայողներ, 2017 թվականի ընթացքում շահադիտական շահագրգռվածությունից ելնելով, իրենց պաշտոնեական դիրքը ծառայության շահերին հակառակ օգտագործելով, նախնական համաձայնությամբ ՀՀ ԱՆ «Վանաձոր» քրեակատարողական հիմնարկում պահվող դատապարտյալներից պարբերաբար պահանջել և որպես կաշառք ստացել են տարբեր չափերի գումարներ: Քրեական գործով կաշառք ստանալու կասկածանքով ձերբակալվել են ՀՀ ԱՆ «Վանաձոր» քրեակատարողական հիմնարկի պետը, օպերատիվ բաժնի պետը և նրանց կաշառք տված անձը:
Դավիթ ԱՐՄԵՆՅԱՆ