Էքստրասենս Անի Մաջնունյանի սպանության գործով այսօր դատարանը հետազոտեց գործում առկա իրեղեն ապացույցները: Դրանց շարքում էին սպանության համար մեղադրվող Մուշեղ Մխիթարյանի բնակարանից առգրավված դանակը, դիակի վրայի դանակի շեղբը, մոխրակույտեր, որոնք Խարբերդի գերեզմանոցից ու Մխիթարյանի տնից էին առգրավվել:
Դրանց վերաբերյալ, փորձաքննությամբ, որեւէ էական հանգամանք չի պարզվել: Հետազոտվող ապացույցների ցանկում էր նաեւ Անի Մաջնունյանի տնից առգրավված ծխուկները, որոնք թքի ու արյան հետքերով փորձաքննության էին ենթարկվել, հենց այդ ծխուկներն են՝ որպես իրեղեն ապացույց դրվել մեղադրանքի հիմքում:
Ապացույցների հետազոտումը կշարունակվի հաջորդ դատական նիստին, իսկ հաջորդ նիստը նշանակվեց նոյեմբերի տասներեքին:
Մուշեղ Մխիթարյանին մեղադրանք է առաջադրվել, որ նա ապօրինաբար Անի Մաջնունյանին դիտավորությամբ կյանքից զրկել է, որը զուգորդվել է ավազակությամբ:
Արփինե ՍԻՄՈՆՅԱՆ
